想紅館開騷 杜德偉呻排期難
Gin Lee號召粉絲做善事
杜德偉去年在新加坡及內地多個城市舉行巡唱，5月又會到台北開騷。前晚他出席音樂會時被問何時回歸香港開演唱會？他坦言一直想在紅館開騷，因覺得紅館是代表香港的表演場地，一直有入紙申請，但大呻很難排期。
杜德偉、李幸倪（Gin Lee）和梁釗峰前晚應邀出席慈善音樂會，藉音樂引起大家關注保單捐贈文化。杜德偉笑言這天有機會跟母校的師弟敘舊：「聽講今日有好多我母校聖保羅書院的師弟到場，我1978年畢業，應該現場好多90後畢業啦，時間過得好快，人生好快，一轉眼由20幾歲，好奇怪就已經到60歲。」
與林志穎友情不變
杜德偉受訪時表示：「我相信生命影響生命，今次呢個音樂會，除咗係普通做慈善工作之外，最緊要係想傳達一個訊息，就係人人都可以做施惠者嗰個。」提到早前林志穎在社交平台上載跟杜德偉的合照，勾起不少人的回憶，杜德偉表示：「我同林志穎喺90年代初已結下不解之緣，係好好嘅朋友。當年我去台灣嗰陣，佢會帶我四圍玩同食嘢，經常見面，後來大家各有各忙就好耐冇見。上次再見面係講唔出嘅感動，真係唔止十年，係廿年人事幾番新！感覺仍然係當年嘅好兄弟、好朋友，咁多年友誼喺心中不變。」
過去一年，他在新加坡及內地多個城市舉行巡唱，下一站是5月到台北小巨蛋，不少香港歌迷都問他何時回歸「主場」開騷？他坦言：「其實我都好想喺香港開演唱會，更希望喺紅館開，因為紅館係香港較具代表性嘅表演場地，可惜好難排期。」
獲大批粉絲到場打氣的Gin Lee表示：「我鍾意做慈善工作，亦知道我嘅fans都鍾意，因為人人都出一分力，就可以變成一種好大嘅能量，而且可以幫到好多唔同需要嘅人，所以我會集結粉絲嘅力量一齊去做慈善工作。我最想幫助救助寵物嘅慈善機構、保護兒童同照顧情緒健康嘅工作，畀有需要嘅人知道你哋冇被呢個世界忽略、遺棄。」
已第二次參與保單捐贈音樂會的釗峰說：「我哋任何一個人都可以施予幸福畀人，不論係畀多同少。呢幾年一場疫情，大家可能同我一樣都會覺得自己好渺小，好容易被擊倒，但原來唔係，我哋可以企番起身，亦都可以伸手去幫人，呢個就係奇妙嘅人生。」
