葉蒨文願為角色keep身形 張曦雯濕身誘惑馬德鐘
香港文匯報訊（記者 梁靜儀）《再見·枕邊人》前晚播出的一集，張曦雯飾演的朱善美（Rachel）被楊萬森（馬德鐘飾）發現聯同聞琪（林熹瞳飾）出賣心聲製作公司，並蓄意破壞晴天（黃智雯飾）節目，為了挽回萬森同情分，Rechel不惜買醉兼淋雨玩濕身，再度使出「心機女」招數。Rechel身穿白色恤衫並透出內裏的白色Bra，大玩濕身誘惑，更向萬森撒嬌賣慘。
張曦雯透露拍攝該場戲份前，有飲酒以便進入狀態，實行「假戲真做」：「買醉仲要夾硬出去淋雨，呢個都係Rechel嘅必殺技，拍攝時鏡頭係由頭pan到落腳，雖然只得短短兩秒，外面亦有件衫唔係最性感，但我好少演seduce（誘惑人）嘅情節，對我嚟講係有少少尷尬，所以嗰場戲有飲酒壯膽，因為Rechel嗰個狀況係醉醉哋，我飲酒都好make sense，可以畀到個feel。」
另外，以斜肩小背心兼熱褲大晒長腿的李君妍，更大晒柔軟度做出「貼牆式一字馬」動作。除了晒好身手，李君妍還繼承了劉穎鏇於《隱形戰隊》中的「七彩小背心」傳說，以不同款式背心亮相。
飾演富家女Evelyn的葉蒨文前晚首度登場，更穿上超低胸造型亮相，葉蒨文透露沒有刻意為演出瘦身，更有吃消夜：「從來唔會控制自己食量，所以體重經常喺47至55kg （103.4至121磅）徘徊，個range 都大，變化取決於嗰排工作量同埋壓力等。」她坦承並非瘦身不瘦胸的人，但認為演員應該對角色作出身體變化，而非以貪靚為大前提：「我係一個演員，並不是美容KOL，亦唔係偶像派，我嘅身形只會服務角色，如果角色需要，才會特意去增肌或者減脂；如果套劇冇特別要求我keep身形，只要體重喺合理範圍內，唔影響我塑造角色呈現出嚟嘅形象，肥與瘦對我嚟講唔係好重要。」她續指平日有做運動習慣，並認為演員定期訓練身體，對於接觸不同角色會有幫助。
