郭柏妍受傷停練 拉琴記憶歸零
黃洛妍處女拍劇當拍MV
無綫小花郭柏妍與「聲夢」歌手黃洛妍分別於新劇拉大提琴與小提琴，郭柏妍透露一年前已學習拉大提琴，但因之前拍節目時弄傷手肘，停了練習3個月，所有學習記憶全部歸零。首次拍劇的黃洛妍笑言視作新挑戰：「當係MV咁拍。」
視帝譚俊彥、視后李佳芯（Ali）、郭柏妍、黃庭鋒與黃洛妍等，昨日在將軍澳電視城為無綫新劇《麻雀樂團》試造型。郭柏妍與黃洛妍分別拉大提琴和小提琴，跟樂手一起演奏，郭柏妍除了為角色剪短髮外，更要學習大提琴，她說：「唔好意思，雖然一年前已知道要拉大提琴演出，但之前喺台灣拍節目《尋找世界另一個我 台灣篇》嗰陣右手肘受傷，停練咗3個月，所以拉琴嘅記憶消失咗，多謝其他樂手幫忙。」她覺得短髮很配合爽朗角色，故捨得剪掉留了多年的長髮。
首次拍劇的黃洛妍表示工作來得突然，故沒有太多準備，絕對是新嘗試。她說：「演出拉小提琴要配合鏡頭，同平時練習唔同，當係MV咁拍。」談到她將其「標記」黃色頭髮染回黑色，她笑言：「其實參加歌唱比賽前就係咁，後來先染咗黃色，我唔係反叛，內心就係咁。」
李佳芯否認強勢回歸
Ali亦為角色剪短頭髮，她透露雖然首次與譚俊彥合作拍劇，但原來兩人登台時試過合唱。身為「魔音」的她笑言當時沒唱首本名曲《小幸運》，跟譚俊彥合唱《小酒窩》，譚俊彥則讚她歌喉值8分，希望有更多機會一齊登台搵真銀，他說：「我仲要為新劇學彈琴，我同Ali喺劇入面嘅關係就似漫畫《城市獵人》嘅孟波同惠香，劇情有啲卡通化同搞笑。」Ali笑言演譚俊彥背後的女人，支持他追夢。
問到是否精於打麻雀？Ali笑言識食胡但不懂計番。提到近年屢傳她被無綫投置閒散，對上一套劇已是2021年的《有種好男人》，相隔這麼久再拍劇會否不習慣？她說：「唔會，大家識咗好耐，見番都好開心。（強勢回歸？）唔係，好彩監製記得我。（之後拍多啲劇？）唔知，希望啦。（續約傾成點？）OK呀， 一路都有傾，但未咁快有Update。（心態有冇轉變？）冇，演員最緊要拍劇同有好角色，我鍾意拍劇，從來冇變過。」
