自言「不安分守己」 霍汶希教女循循善誘
香港文匯報訊 日前英皇娛樂集團營運總裁霍汶希（Mani）受麥當勞邀請，到其全新總部演講，分享作為女性成功之道的自身經歷。
Mani雖然外表剛強，不過在演講期間發揮其幽默感，頓時帶動全場氣氛，不時令員工捧腹大笑，反應十分熾熱。Mani自言「唔安分守己」，於是她39歲那年，決定跳出舒適圈，主動申請到內地工作。移居北京第一個星期，很開心，但一個月後便抑鬱起來，「好快就冬天，好凍，嗰陣時北京冇𠵱家咁多嘢食，全部都好油好辣，我肚屙咗一個月。」又因為自己的普通話是「有限公司」，初期更發生不少尷尬場面，她認為去到一個新地方除了要適應當地環境、融入當地文化，更要學習，「我真係𠵱家日日都不斷咁學緊新嘢。」
問到如何handle或帶領「Gen Z」時，Mani便以教女作比喻，她坦言「教女係最難！」她謂以前教藝人，藝人的母親十分感謝她，因為藝人都聽她的話而不聽他們母親的話，「呢個年代要認同佢哋之餘，要用啟發嘅方法，我唔會同佢哋講應該做啲乜，我會畀佢哋幾個唔同嘅選擇，但我心裏面當然有一個覺得係最好㗎啦。好似我個女咁，佢唔肯彈鋼琴，我話：『小朋友一定要學一個樂器㗎喎，你自己揀啦。』佢話打鼓，我話：『打鼓都唔錯，但係表姐又拉二胡喎，其實二胡都唔錯、古箏都好嘅，但我覺得拉二胡好適合你，你可以同表姐交流吓。』引導佢，等佢講咗出嚟先，最後佢話：『咁二胡啦。』我話：『咁你揀㗎喎，以後你要花心思。』咁佢就拉咗八年啦。路係佢自己揀，你不能揀條路畀佢行，你揀條路畀佢行，佢一定唔行！引導，同埋畀佢幾樣嘢揀，揀完之後，你已接受但一切照舊嗰啲呢，哈哈。」
