龔嘉欣有「婚」數 目標做視后
衝事業 踩入飲食界
龔嘉欣近年除幕前演出，更涉足飲食界，去年與日籍蛋糕烘焙大師兼緋聞男友松岡哲也合作開餐廳，郎才女貌相當合襯。嘉欣開到口想結婚生仔，但就不會主動求婚，亦不會設定結婚歲數，想在事業上衝刺，若有機會做視后便覺得人生很圓滿。
採訪：梁靜儀 攝影：黃艾力
去年龔嘉欣與陳豪合演劇集《新四十二章》，以及與張振朗主演的《靈戲逼人》，均成為無綫去年收視排第4名的其中兩套劇，後者更在「亞洲影藝創意大獎」中贏得「最佳喜劇節目」殊榮。嘉欣坦言很開心觀眾喜歡《靈》劇：「因為除咗搞笑，仲有好多感動位，最開心係觀眾鍾意，反應係我哋意料之外。」她與振朗正為續集度橋，組織好故事便向監製Sell橋。上一輯悲劇收場，續集會否想大團圓結局？她坦言鍾意悲劇收場：「我好衰，我好鍾意悲劇，最尾個心一定要『揦』一『揦』，會印象深刻啲。」
與緋聞男友合作有拗撬
除了幕前演出，嘉欣同時還要兼顧餐廳生意，去年她與松岡哲也合作開餐廳，她表示生意OK，但未計數是否已回本。愛親力親為的她不用開工便會到餐廳幫手，她說：「我鍾意落去同同事傾偈，佢哋真係好辛苦。有時見佢哋食飯、去洗手間嘅時間都冇，盡量幫到就幫，始終我都有正職。」訪問時嘉欣不時接聽員工電話，老闆娘的確不易為。
因劇集在大灣區播映，令內地觀眾認識嘉欣，問到可想趁機在大灣區開分店？她坦言能力上暫時未做到：「依家我要兩邊兼顧覺得係有啲難度，所以唔敢諗住。」問到與緋聞男友松岡哲也合作可有拗撬？她承認二人曾有拗撬：「我個人鍾意有咩都直接講出嚟商量，大鬧就一定唔會，大家都成熟，想解決件事。」
眼見身邊閨蜜相繼搵到好歸宿，34歲的嘉欣亦開到口想結婚生仔：「不過唔係咁容易囉，加上未有對象，同埋要諗對方嘅諗法係點。（會主動求婚？）我鍾意被求婚多啲。」嘉欣笑言以前想過25歲結婚，之後就推遲到30歲，現在不再設限期，想在事業上衝刺。問到是否想贏視后才結婚？她坦言：「我覺得攞咗就圓滿啲，但攞獎牽涉天時、地利、人和。」談到新年願望，她坦言現在沒想太多反而更開心，有工作便盡力去做好，過好每一天，覺得人漸長大開始接觸生老病死，沒有東西比健康更緊要。
