貨尾好賣 新盤推遲
湯文亮博士 紀惠集團行政總裁
有朝早去到茶餐廳，有客人話地產商其實並未想到財爺減辣，所以完全未有準備，否則，在撤辣後十日，仍然只得一個新樓盤138個單位推售，如果有準備，應該日日有新樓盤推出。
老闆話，地產商應該知道減辣，但冇諗到連SSD都撤，但無論如何，地產商是有兩手準備，首先是促銷貨尾單位，因為貨尾單位大多數是現樓及短期樓花，如果賣得好，就唔會咁快推新樓盤，否則，就只有大量推全新單位長期樓花，地產商其實唔想咁做，現在貨尾單位賣得好，點解要推新樓盤。
有客人眼利，見到焗爐有一盤新鮮蛋撻，但點解唔攞出嚟，老闆話，仲有幾個蛋撻未賣，等多幾分鐘，就會攞焗爐蛋撻出嚟賣，同時又再焗多一盤，做生意的人就是這樣，貨尾好賣，點解要賣新貨。
成交增多才對得起撤辣
講開又講，在財爺撤辣之前，有很多人話撤辣無效，不但樓價仍然會下跌10%，成交量亦不會增加，而事實上撤辣是大眾市民要求，如果沒有顯著效果，證明樓價下跌是市場上沒有足夠購買力，而非辣招所導致，所以，無論新樓或者二手樓熱賣，才可以證明撤辣是有效，在撤辣之後8日，新樓賣了955個單位，只有138個是第一次發售，其他都是貨尾單位，有咁嘅成績，才可以講對得住政府撤辣。
至於點至驗證到樓市轉旺，就是睇樓。如果撤辣之後，買家想去睇樓，時間方便代理及業主，但仍然很難約到睇樓，由此證明，樓市應該很旺。
