綠軍大炒拓荒者 聯盟首隊50勝
在兩名主力包括賀列地與普辛基斯同時缺陣下，塞爾特人憑陣內的「探花雙星」達圖與謝倫布朗齊齊交出正常發揮，昨晨輕輕鬆鬆在NBA常規賽作客以121:99大勝拓荒者。賽後，「綠軍」成為聯盟今季首支取得50勝球隊，亦宣布提早18輪鎖定了季後賽一席，盡顯王者氣勢。
生涯第500次出戰常規賽的達圖今場攻入26分，謝倫布朗則有27分進賬，塞爾特人昨日未受考驗便完成大捷。達圖賽後滿意表示：「喺球季呢一刻達成50勝，即係話我哋做緊正確嘅事。更加恐怖嘅係，我哋仲可以做得更好！」謝倫布朗則補充：「所有人都笑得開心，因為我哋一年前都係做緊同樣嘅事，能夠喺呢隊波入面真係莫大榮幸！」值得一提，「綠軍」經已是連續三季常規賽突破50勝，表現穩定兼持續進步。
另邊廂，獨行俠作客以127:92大炒公牛，首席球星當錫交出27分12籃板14助攻，連續7場取得20+得分的「三雙」，追平了「波神」米高佐敦及奧斯卡羅拔臣的紀錄。
