新手入門講解
■ 並非惡毒詛咒
成日聽「打你個小人頭，打到你有氣無碇透」之類，好似講到要置人於死地一樣，非常狠毒；其實真正打小人只會講「打過小人大展鴻圖」、「打過小人升官發財」等，多數只求福求財，並非損人利己！
■ 決不指名道姓
一直以嚟打小人只為驅走身邊「小人」，泛指身邊一些是非或者厄運，並不會指名道姓打某某人，而負責打小人的婆婆亦一般唔會接受指名道姓的要求，因為會折福㗎！不過發展至今好多人已經唔理，直接寫上小人姓名，婆婆都會照打，鬼叫搵食艱難咩！
■ 九龍有得打小人
大家都知灣仔鵝頸橋長期擺檔打小人，其實九龍都有得打，就是油麻地廟街、榕樹頭天后廟對開。另外西營盤福德祠都有得打，不過當然都是以鵝頸橋最大規模啦！
■ 切勿張揚
打小人屬於偏門活動，其實不宜張揚，所以打小人千萬唔好貪得意影相放上社交平台；另外都唔好於自己工作區域打喇，畀人撞見一樣唔好！
