哥帥讚科頓 英超第一人
梅開二度領軍反勝曼市打吡
前晚上演的英超曼徹斯特打吡，衛冕的曼城主場出擊，有驚無險以3:1反勝曼聯，全取3分繼續向榜首利物浦施壓。今場「藍月亮」贏波功臣是梅開二度的菲爾科頓，主帥哥迪奧拿賽後大讚這位23歲英格蘭國腳已晉升成為英超最佳球員，就連一向挑剔的曼聯名宿講波佬堅尼都對他讚不絕口，指英格蘭代表隊的未來都要靠科頓。
拉舒福特開賽8分鐘的禁區外世界波為曼聯先開紀錄，曾帶給「紅魔鬼」球迷驚喜及半場1:0的領先優勢。可是換邊後卻是曼城天下，最終靠科頓的梅開二度及夏蘭特的補時入波，反勝「紅魔鬼」3:1。贏波後的曼城賽後以27戰62分續居次席，僅落後「一哥」利物浦1分。
曾經執教美斯，陣內又有夏蘭特與奇雲迪布尼兩大世界級球星，但哥迪奧拿賽後卻將贏波榮耀歸功於科頓，更大讚後者為英超最佳球星：「依家呢一刻，佢就係全聯賽最佳。要成為世界級，你要識贏比賽，佢就已經做緊。以前佢成日入波，但依家佢不斷贏比賽，當你做到咁，就係提升到另一級別嘅球員。」
哥帥再補充：「以佢嘅年紀，踢咗嘅比賽，入過嘅波，贏過嘅冠軍，佢已經係個傳奇球員。佢係今季最佳球員，我尊重所有球星，但冇人可以好似佢咁，喺今季有咁重要嘅影響力作用。佢以前會好積極去帶波同爭取入波，但佢依家變得更成熟，明白防守嘅重要，開始更加明白球賽。你哋有冇睇到佢三番四次回後搶番個波？佢已經成為咗勝利者，呢啲係勝利者嘅心態，亦因此佢對我哋同英格蘭都咁重要。」
堅尼撐必入英格蘭正選
英格蘭主帥修夫基都是今場座上客，堅尼亦大讚科頓的演出：「佢進步咗，表現神奇，踢法聰明嘅球員。佢係個團體球員，一定係英格蘭正選。喺曼城面前，曼聯嘅漏洞無所遁形。」另邊廂，曼聯已經跌至第6位，距離第4位的阿士東維拉11分，但「紅魔鬼」主帥坦哈格仍堅信曼聯有機會搶得歐聯資格。
