皇馬 和華倫 失分兼輸人
補上補入球取消掀爭議
醜聞？冤案？西甲班霸皇家馬德里昨晨在聯賽作客華倫西亞，在全場補時9分多鐘的絕殺球慘被球證以超時理由判定作廢，最終雙方打和2:2，皇馬痛失兩分。「銀河艦隊」管理層賽後狠批球證判處不公平，指這是西甲近年最大醜聞，但「蝙蝠兵團」主帥巴拉查則力撐判決合理；最陰功是本來做「贏波英雄」的祖迪比寧咸更因投訴過激被罰紅牌，皇馬今鋪賠了夫人又折兵。
華倫西亞上半場中段憑曉高杜路及耶梅卓克兩名前鋒先後建功，一度領先2:0；半場補時雲尼斯奧斯祖利亞為皇馬追回一球，到下半場中段再整多粒，助皇馬追平至2:2。補時階段，華倫一度曾搏得12碼，但經VAR覆核推翻原判，比賽繼續，但期間拖延了約兩分鐘。原定補時為7分鐘，去到98分半鐘，皇馬獲得角球，球證基爾未有吹停賽事，莫迪歷開出角球被華倫守衛頭槌頂走，巴謙戴亞斯截得皮球推向右路禁區邊傳中，球證此時突然吹完場雞，比寧咸隨即近門頂入，入球卻被判無效，球證宣布完場。
比寧咸完場後因投訴過激被罰紅牌趕離場，據知，基爾在球證報告上寫上：「完場後，比寧咸以一種咄咄逼人態度向我大叫，並且多次重複『呢個肯Ｘ定係入波啦』。」但皇馬主帥安察洛堤受訪時則為愛徒解釋：「佢冇去侮辱球證，佢相當尊重人，佢只係用英文講『呢個肯Ｘ定係入波啦』！」同樣一句說話，球證與「肥安」看法大有不同，而據《阿斯報》指，比寧咸將會被罰停賽兩場。
對於球證判罰，《馬卡報》指皇馬高層認定今次事件是近年最大醜聞，足以寫入足球史冊，強調他們會積極爭取西班牙球證的大改革。可是，華倫主帥巴拉查則說：「我好清楚睇到，球證喺傳中前已經吹雞，冇乜好講。」有前西甲球證伯魯爾向傳媒解釋：「巴謙戴亞斯傳中已經係第二次進攻，球證吹得啱！」
雲尼斯奧斯省兩粒復仇
另外，皇馬前鋒雲尼斯奧斯上季作客華倫，曾被種族歧視鬧出滿城風波，今次梅開二度後，則向主隊球迷方向舉手「示威」，相當得戚，充滿挑釁性！」
