黃智雯人妻發力 挑戰無限可能
兼顧家庭事業
新的一年，黃智雯（Mandy）展開人生新階段！去年宣布婚訊及離巢無綫的她，一口氣迎來兩大轉變。以人妻身份在新工作環境重新出發，Mandy將努力發掘自己在工作上的更多可能性，同時間亦會全力學習如何平衡家庭與事業。
採訪、攝影：子棠
有相士預測，肖狗者今年有變化之象，包括感情和事業，肖狗的Mandy早已應驗。去年底她與拍拖11年的詹文天（Anthony）結婚成為人妻，又毅然離開効力16年的TVB向外闖。雖然身份轉變，新任詹太卻沒有被家務考起，事關她出得廳堂，也入得廚房。
入得廚房 出得廳堂
Mandy說：「我同另一半同雙方家人都好Modern（新潮），睇我哋冇舉行傳統嘅婚禮就知啦，所以之前過年都冇特別嘅新年習俗，不過我都會親手做啲賀年美食。細個嗰陣，外婆每逢過年都會親自做角仔、年糕、蘿蔔糕等，只係外婆擔心危險，唔准我幫手，但我喺旁邊睇都偷到啲師嘅，雖然唔及外婆嘅兩三成功夫，但仲有胡蓓蔚教我包餃子。唔好睇我外表『論論盡盡』，話晒我都係美女廚房Top Five！」
問到當上詹太後，一日為老公煮幾多餐？她笑言：「我知道有人會買外賣當自己煮，我年中都幫襯唔少次外賣App，可以考慮搵我做代言人，哈哈，講笑咋。我都有賢淑嘅一面，五餸一湯附加甜品都冇問題，較難嘅菜式可參考網上食譜，所以都唔會煮到好難食；再者我煮乜都好，老公都應該會鍾意，奶奶亦試過我嘅手勢，其實最重要係有冇用心煮，落廚都係一種愛心。」提到她要派雙封利是，她風趣說：「Double up？冇所謂，我已經諗好咗，派多啲利是，我就帶埋愛犬出嚟逗利是，狗糧好貴，仲要買玩具呢！」
提到她去年一口氣做了人生兩大決定，離巢TVB是否為免拍劇太忙影響婚後生B？她笑言：「哈哈，講到好似推理劇咁嘅。劇情唔係咁樣發展，只係呢兩個重大決定喺同一點遇上，並非一個布局。」她續稱：「拍拖11年，結婚係好大轉變，同時間喺TVB做咗16年，有離開嘅決定話唔擔心都係呃人，正如好多人喺一間公司做得太耐就唔想轉變，或者拍拖耐咗就唔想結婚。喺舒適嘅環境下當然好，但會沉迷，唔想離開。而我係好怕重複同一模式嘅人，相信身邊人都會有影響，特別係工作上，見到身邊一班姊妹好有自發性、對事業好有追求，令我覺得自己都唔可以怠慢。其實早幾年前已有結婚計劃，只係遇上疫情，之後就撞啱約滿，當時就反思人生，發現演藝工作上仍有好多追求。簽約新公司後，我希望可以多棲發展，焦點唔只拍劇。我之前演出過舞台劇後，電影、綜藝節目等各方面都持開放態度，甚至想接觸創作，挑戰自己一手包辦嘅舞台劇本同演獨腳戲；就連新媒體例如喺網上推介舞蹈、戲劇，或者身心靈分享等都想嘗試，盡力發掘自己更多嘅可能性。」
天生勞碌 生育隨緣
Mandy坦言覺得自己好幸運：「另一半好清楚知道演戲對我係好重要，一直好尊重同支持我。我哋有共識生育隨緣，小朋友絕對係上天賜予嘅禮物，所以大家祝我連生貴子、恭喜發財、賺多啲……都係祝福，我統統接受。只係少勞多得就諗吓好喇，我應該係勞碌命。」
