唱千嬅歌似鄭秀文 陳蒨葶照入10強
《中年2》戰況激烈 引起網民熱議
無綫歌唱真人騷《中年好聲音2》戰況激烈，經常引起網民熱議，10強之一的顏米羔力撐賽制公平：「你企喺台上唔出聲唔通又會畀分？」被網民質疑冇資格入圍10強的陳蒨葶指，被Foul的選手不代表沒有實力，感激評審挑選了她，她承諾會不斷改進做到最好。
《中年好聲音2》10強參賽者古淖文、譚輝智、顏米羔、安雅希、黃劍文、劉威煌、陳俞霏、林若盈、沈宗賢及陳蒨葶，昨日出席記者會分享備戰狀況。暫時得分最高的古淖文表示會以120%努力迎戰，顏米羔則自稱身體弱，會爭取時間休息。
古淖文坦言沒想過躋身10強：「因為大家都好厲害。（你啱啱又拎MVP）好開心，有光宗耀祖嘅感覺。第一次Solo攞9字頭（分數）覺得好正。上次係團體，今次Solo意義重大，好多謝谷婭溦鞭策。」問到是否有信心攞冠軍？他坦言不敢想，但希望每次演出都可以進步。
轉了新髮型的顏米羔笑言：「難得有機會有髮型師服侍，順勢改變吓，每個環節都想帶啲新鮮感畀大家。」一向被指唱歌時充滿殺氣的他，被問是否想轉髮型減殺氣？他笑言：「冇得改，呢個唔係殺氣係信心。」問到有否視古淖文為勁敵？顏米羔指所有參賽者都是朋友，但不會讓獎：「最緊要享受過程。」
「覺得凶多吉少」
對於有網民覺得賽制不公，古淖文大呼冤枉，直指自己唱得很辛苦；顏米羔則說：「我哋喺台上唔會好似拍電影咁有take two，台上嗰幾分鐘要發揮得最好，人哋先會睇到。練習嗰陣幾好都冇用，你企喺台上唔出聲唔通又會畀分？冇可能，我唔認為唔公平，因為每個歌手上到台，能唔能夠將自己最想做嘅嘢做出嚟，如果稍為有啲嘢做得唔好，後果就係等下次機會。」
最近兩次均跌入危險區的陳蒨葶坦言心情如坐過山車：「過到初一過唔到十五，覺得凶多吉少。」談到一直被視為大熱的鄭梓浩被Foul，不少網民將矛頭直指她，批評她唱楊千嬅的歌卻唱得像鄭秀文，但沒有對方的台型未能壓場，直斥賽果不公！陳蒨葶對此表示：「我哋係被動嘅，好多謝評審揀咗我，大家喺邊個回合走都唔代表佢係差，係大家實力都勁。好多謝所有觀眾支持我哋，當然會有人鍾意有人唔鍾意，亦證明大家都好鍾意鄭梓浩。」她承諾會不斷改進，將最好的自己帶給觀眾。
