與張曦雯互摑 黃智雯面腫敷冰
馬德鐘享齊人福嗌辛苦
馬德鐘於無綫新劇周旋於黃智雯（Mandy）與張曦雯（Kelly）之間，他笑言有苦自知，奉勸天下男人不要試。Mandy與Kelly於劇中為爭馬德鐘，大打出手互摑對方，二人均稱現實中未試過打人，心情緊張，Mandy更稱拍完後有少少面腫，要敷冰消腫。
馬德鐘、黃智雯、張曦雯、羅天宇與鄭俊弘等，昨日出席無綫新劇《再見·枕邊人》宣傳活動，眾星大玩遊戲，模仿劇照在「床上」擺甫士，又派花給現場觀眾，非常熱鬧。
Kelly笑言跟馬德鐘多次合作：「佢睇住我大。」馬德鐘即讚Kelly演技有進步：「佢表現到角色好狂嘅一面，完全唔認得佢。」他又讚Mandy專業：「同佢有場落水戲，當時天氣好凍，拍完佢竟然唔上水話等下一場，好佩服。」Mandy透露拍攝期間氣溫不足10度，加上不懂游泳，拍攝前有點擔心：「好彩馬德鐘好好，佢教我點樣好安全咁慢慢將個頭浸落水。」
首次演反派的Kelly笑言希望觀眾越睇越憎她，又指不覺得角色是第三者，因Mandy失蹤後，她才跟馬德鐘一起。提到她於劇中與Mandy為了爭馬德鐘而互摑，Kelly自稱現實中性格平和，未試過打人，亦未試過爭男人：「事前同Mandy綵排好多次，都有叫佢唔好手軟，情願大大力好過NG。」Mandy亦稱拍互摑戲前心情緊張：「現實中未試過打人，之前拍劇都只係摑男人。我第一次打女人，又驚摑花個妝，又驚大力得滯打痛佢！」Mandy表示因要就不同鏡頭，故拍了逾10次：「拍完都有少少面腫，要敷冰消腫。」
Mandy米蘭之行被偷利是
剛去完米蘭時裝周的Mandy大讚現場氣氛好，但不幸被扒手光顧：「我同助手出去諗住街拍短片，當時玩緊自拍，突然覺得手袋郁咗一吓，轉頭就發現利是唔見晒，好彩人冇受傷，啲證件仲喺度。」 她之後看自拍片，發現錄下了整個偷竊過程：「一個三四十歲嘅女人用條圍巾掩護，然後伸手入我個袋。其實我太大意，出發前好多親友提醒我歐洲有好多扒手，今次當買個教訓，損失咗4位數字。」
馬德鐘於劇中周旋於兩女之間好艷福，但他苦笑稱很辛苦，奉勸天下男士不要試：「成日俾人鬧，加上我要應付動作戲都幾辛苦！」
