肥普死撐要為車仔球員驕傲
與英足盃冠軍擦身而過，車路士原來已經連續6次在國內盃賽決賽敗陣，賽後「藍戰士」更被曼聯名宿加利尼維利批評為貴價兵嬌生慣養，壓力下例牌崩潰，強調不會給予同情。對此，車路士主帥普捷天奴表明不同意加利佬睇法，並指會為球員付出的努力感到驕傲。
「肥普」賽後說：「我同加利都算老友，我尊重佢意見，但唔同意佢睇法。當然，我哋加時戰換走咗干拿加歷查同芝維爾，的確保持唔到個表現，但我肯定會為我隊員驕傲，佢哋真係付出咗好多。我哋係支年輕嘅球隊，唔應該用完場時多幾個年輕球員嘅利物浦去比較，加利知道當中分別，咁講根本唔公平。」
普捷天奴也許確實相當失望，事關當他步上頒獎台領獎時，步過車路士班主保希利身邊，竟然被鏡頭拍得無視對方直接走過，僅與保希利身邊人握手，此事當然惹起網民熱話。此外，車路士中場安素費南迪斯也在往領獎途中，受到利物浦球迷挑釁狂寸，一度以凌厲眼神回望對方，疑似準備以行動還擊，可幸在隊友勸告下，才繼續前行，未有發生不愉快事件。
