高海寧戰鬥力暴升 唔再做豆腐Ling
黃智賢除剩底褲通街跑
高海寧（高Ling）、黃智賢（Ben）、周嘉洛、謝嘉怡、吳偉豪與游嘉欣等， 昨日到將軍澳電視城出席新劇《武林》造型暨拜神儀式。高Ling透露會耍雙刀，希望洗脫「豆腐Ling」之名。黃智賢自爆僅穿內褲拍裸跑戲，心理壓力很大，要操Fit身形。
高Ling與Ben在新劇飾演前度關係，二人更是武林高手，一個擅長雙刀，一個拳腳功夫了得。高Ling透露飾演美容師，使出「還原靚靚拳」幫女士美容，同時亦是隱世高手，故去年10月她已上堂練武，希望洗脫「豆腐Ling」污名，升級做「炸豆腐」，她說：「因為我本身好易受傷， 初時要耍豬肉刀，但好重，後來改耍雙刀，仲要做一字馬。原本要戒食醋，等啲筋軟啲，但我又好鍾意食水餃，冇醋唔得，暫時啲筋骨都未夠鬆，所以練唔到，到時再算。」
Ben自爆其角色是武功最好的一位，以拳腳為主，尾段更會耍天龍刀，身旁的高Ling即踢爆他有裸跑演出，他笑言：「呢場戲令到我心理壓力好大，我會除剩條底褲通街跑，自己未試過，好驚！因為呢場戲一直要Keep Fit 。」
周嘉洛自嘲「崩壞版朴敘俊」
飾演的士司機的周嘉洛新髮型被指似韓星朴敘俊，他自嘲說：「人哋係靚仔，我係壞咗嘅栗子頭。」他又指於劇中單方面喜歡謝嘉怡。謝嘉怡表示會耍劍，去年8月已開始練習，嘉洛則表示十八般武藝都要學：「我要騷Body，上下都要操練。我一直想拍打戲，今次好開心可以圓夢。」
吳偉豪以交通督導員制服亮相，游嘉欣則為了角色剪短髮， 臉龐較以前清秀。問到告別長髮可有不捨？她說：「未至於喊，差少少，不過剪短髮好易打理。」吳偉豪稱與游嘉欣並非演一對，但二人的關係會令人誤會。
