香港銀行非常大方
湯文亮博士 紀惠集團行政總裁
有最近被銀行call loan call到暈的老友話，唔明白他與銀行做了幾十年生意，從未有過呆壞賬，但銀行以估價下降為由向他追差額，搞了一大輪卒之搞掂之後，銀行又話會降低借貸比率，在現行貸款金額打個八折，又繼續向佢追差額，不過好好彩，他搵到一間非香港銀行做按揭，利息只是貴些少，但可以依足金管局要求借錢，轉按之後，不但不用補差額，甚至可以借多啲。老友話唔明白，點解非香港銀行可以借，自己銀行反而唔借。
老友在城市長大，從未見過流浪貓，唔知道動物界弱肉強食的道理，一隻流浪貓生了幾隻貓仔之後，知道咁多貓仔跟住佢一定會餓死，於是揀最健康的兩三隻送給人類，貓乸知道如果不是送最健康的，人類不會接受，剩番兩三隻質素差的就跟住佢，很多時都過唔到冬天，香港銀行也是一樣，向按揭借貸比率不足五成的客戶call loan call到暈，即是將最優質客戶送畀其他銀行，只有一些高成數按揭，甚至負資產的客戶仍然留在銀行，同樣地很多時都過唔到冬天，估計今年銀行呆壞賬會大幅增加。
不得不作出犧牲
老友話香港銀行真係非常大方，但唔明白點解要咁樣做，我就認為銀行要維持香港作為金融中心地位，不得不作出犧牲，全世界不知幾多國家的銀行在香港開設分行，如果沒有足夠生意，他們一定會離開，而香港銀行將優質客戶送給他們，那些銀行搵到食自然唔會走，令香港作為世界金融中心有極大幫助。
