被親友追問婚期 謝東閔：冇咁快
激罕晒朱智賢合照
甚少公開放閃的謝東閔，激罕於情人節在社交網上載與女友朱智賢的恩愛合照，即傳二人好事近。昨日他出席劇集宣傳活動時，笑言有被親友追問婚期，但相信不會在短期內發生，若有好消息必定會公告天下。
謝東閔、孔德賢、吳嘉儀與黎燕珊等昨日到將軍澳電視城，出席劇集《本尊就位》宣傳活動。該劇將於周五大結局 ，首次做男一的孔德賢表示對觀眾反應感到驚喜及開心，知道香港和內地都有人討論。同樣首次擔正的謝東閔對劇集成績感開心：「見到網上同身邊同事都話好睇、睇得開心，所以之前拍攝辛苦都唔記得喇。女友朱智賢都有睇，話我演番自己都係咁戇直。（覺得係讚定彈？）梗係貶我啦！」對於女主角陳嘉慧最後都未有參與劇集宣傳，二人希望她之後可帶BB出來見大家。
吳嘉儀派利是失預算
提到情人節謝東閔在社交網上載與朱智賢的合照放閃，被傳好事近，他笑言：「之前出席袁偉豪囝囝百日宴，俾好多人追問係咪今年拉埋天窗，我都唔知，應該唔會住啩，冇咁快。（求婚未？）如果結婚我會公布。」他又透露近日為愛犬的病而煩惱：「之前安排隻狗去剝牙，佢17歲喇，做完手術過一排隻牙又有事，再睇第二個醫生，原來之前個醫生連隻狗有幾多隻牙都寫錯，仲要不停推卸責任，所以我諗住追究！」更考慮報《東張西望》。
首年派利是的吳嘉儀笑言派了5位數，大失預算：「我已經預多咗，但因為身邊好多朋友都有小朋友，所以唔夠派，尋晚仲要去撲銀紙，好彩有同老公Claim錢。」曾哭訴遭老公趕出家門的她，被問是否已雨過天青？她笑言：「我好迷信，之前有風水師話我哋一個火一個木，命格相剋，困喺一間屋會燒起嚟，要多外出，今個新年去咗好多廟宇祈福，之後打算兩家人一齊去海南島旅行。」
