痛失伯樂 盧卡古執定行李去中東
去年9月由車路士借投羅馬的比利時中鋒盧卡古，初期在摩連奴麾下曾有過蜜月期，於連續10場比賽中轟入11球。不過自去年底起狀態已開始走下坡，近7場正式賽事僅入一粒。尤其在「寸王」被解僱後，盧卡古痛失極寵愛他的伯樂，近3場意甲雖然踢足每一分鐘，但在前線形同虛設，未立寸功。
羅馬新帥迪羅斯要求搶逼及前線快速互相走位配合，活動範圍及速度不足的盧卡古即顯得格格不入，經常在前線成為局外人，睇波多過踢波。已經30歲的盧卡古目前身重步慢狀態一般，即使有心改變來遷就新帥亦不容易。羅馬球迷及意國傳媒亦不看好他可以重返高峰，更相信他會在迪羅斯麾下逐步被邊緣化，不但難指望會獲羅馬買斷，季後獲續借的機會亦極微。甚至有羅馬球迷呼籲他不要成為球隊負累，下季疊埋心水往沙特掘金。
