佘詩曼盼龍年再遇好角色 炎明熹積極尋好歌出大碟
香港文匯報訊（記者 子棠）佘詩曼（阿佘）和炎明熹（Gigi）兩大紅人在過去的兔年可說是豐收的一年！阿佘於兔年主演的《新聞女王》掀起久違的煲劇潮，更於《萬千星輝頒獎典禮》上勇奪「三料視后」，氣勢如虹，龍年有望再創高峰；至於感情方面，工作竭盡所能的阿佘面對愛情則採取隨緣態度。而Gigi去年既考進了心儀的大學，又舉行了入行首次個人演唱會，早前還宣布會在4月再開個唱，展望龍年，Gigi也給自己訂下了新目標。
孝順女阿佘在過去的一年忙得不可開交，原本計劃新春外遊休息叉電，最後也決定改為多陪伴家人。「我本來真的Plan去旅行玩下，但最後決定都係唔飛，因為之前幾個月真係好忙，冇乜時間喺屋企，不如趁過年有假期同家人朋友喺屋企聚下，玩下大細魚蝦蟹，熱鬧度過。稍後月底都會去法國時裝周，到時先寓工作於娛樂。」
阿佘愛挑戰新角色給驚喜
阿佘去年憑《新聞女王》爆紅，觀眾最關心是《新聞女王2》會否真的在龍年落實開拍，而阿佘又有否什麼角色還想挑戰？她說：「我都好希望會有好消息；至於話有咩角色想挑戰，其實但凡我未試過的都想試，我本身唔會預設我想演啲咩角色，因為我鍾意嗰種驚喜。」談到龍年大計，阿佘說：「2023年拍咗《新聞女王》和《家族榮耀之繼承者》兩齣劇集，認識不少新工作夥伴、團隊，又可以同好多好朋友再合作，非常充實同開心的一年。現在出街仲有人叫我『Man姐』（《新聞女王》角色），呢個真係好滿足！龍年最理想係可以再畀我遇到好劇本同好角色。」
事業得意，問她龍年會否最想遇到段美好姻緣，搵到真命天子，阿佘笑笑口道：「愛情就一切隨緣，相信對的時間會出現對的人。」
至於Gigi談兔年最難忘的是開了她人生第一個售票演唱會，「我覺得好榮幸，同埋好開心可以見到大家。踏入龍年，除咗要繼續努力讀書，考到好嘅成績，工作上都希望有更多唔同嘅突破，今個龍年我有個小心願，希望可以推出自己嘅個人大碟，呢個係我龍年最想完成嘅目標。」
Gigi望與出色音樂人合作
去年的作品《Little Magic》連奪「勁爆歌曲」及「叱咤專業推介十大」，之後唱劇集《新聞女王》主題曲《Crystal Clear》，首次奪得「最佳電視歌曲」，Gigi坦言這都是音樂團隊努力的成果，期望新年能夠擁有更多更受廣大樂迷喜歡的歌曲。她說：「好歌難求，希望龍年遇到更多好嘅監製、出色嘅音樂人，遇到自己鍾意、樂迷又鍾意嘅好歌，因為出一張大碟，要集合好多歌先可以完成，所以要花更多時間，同我嘅音樂團隊溝通。」
Gigi為龍年定下願望和目標，但身體健康最重要。「可能去年中咗流感，病到咩都做唔到，仲要屋企人同粉絲擔心，所以大前提最重要係身體健康，繼續做個真的『漢Gi』。」
學業、事業兩忙，踏入龍年，Gigi在大年初一晚上參與了花車巡遊，現場載歌載舞，與大批市民一起感受新年熱鬧氣氛。
佘詩曼化妝：Katherine Lo
髮型： Lorraine Lam @ Hair Culture
服裝：Shanghai Tang
造型：Christina Hsu
