林凱恩迎龍接福 以「蛻」為進
心境決定境界 從不覺有人生低潮
今日是大年三十，無綫小花林凱恩提早向《香港仔》讀者拜年，祝大家身體健康，心想事成。既拍午間節目《流行都市》，又拍處境劇《愛·回家之開心速遞》，林凱恩可謂早晚都陪住觀眾。踏入龍年她力求蛻變，希望拍更多劇及演不同角色，不再局限演乖乖女角色，讓更多觀眾欣賞她不同的一面。
文：民章 攝：曾霆洭
林凱恩參選2015年港姐贏得友誼小姐入行，最為人熟悉當然是《愛·回家之開心速遞》的角色「Bonnie」。新一年目標，她希望繼續做主持，更想多拍劇集，她說：「希望今年再努力啲，演多啲唔同角色見觀眾。之前拍咗《再見·枕邊人》同《非常檢控觀》都係客串形式，所以今年想演有多啲戲份同唔同嘅角色，始終我演乖乖女形象深入民心，希望可以將唔同嘅我畀觀眾睇到。」
最愛與周嘉洛「拍拖」
講到林凱恩最令人深刻的角色必定是《愛》劇的「Bonnie」，以及《她她她的少女時代》的「張晴」，前者可愛善良，後者則是反叛少女，更有性感演出，當時網民除了讚她身形靚外，更指她演技有進步。問到喜歡「Bonnie」還是「張晴」？林凱恩笑言已跟「Bonnie」融為一體：「其實Bonnie（性格）就係我，咁我一定鍾意自己，哈哈！但如果最深刻一定係演張晴，因為可以同咁多前輩合作，令自己進步得比較快，個角色亦好寫實，可以演到我唔同嘅一面，所以我好鍾意。」
之前由於周嘉洛要拍劇集，要暫別《愛》劇一段時間，故編劇刻意將其角色「金城安」與「Bonnie」分開，「Bonnie」則與「葱頭」（丘梓謙飾）拍拖。現時周嘉洛重返《愛》劇已一段日子，不少網民都希望「金城安」與「Bonnie」復合，期待他與「葱頭」爭女！林凱恩笑言：「會唔會有三角戀就要睇編劇點寫，有可能加入新角色爭我或者爭葱頭。」問到喜歡「金城安」還是「葱頭」的感情戲？她說：「我鍾意安仔多啲，因為葱頭喺劇入面係明星，我同明星拍拖要演得拘謹啲，唔可以咁跳脫。同安仔個感覺就貼地好多，做到一種普通平凡，唔使刻意左避右避。」
有一段時間林凱恩被指遭公司投閒置散，工作量大減，更於去年初播映的賀歲劇《黃金萬両》演沒有全名的閒角。但當問她有否經歷過低潮日子？性格樂觀的她以堅定的語氣說「冇」，林凱恩說：「可能我性格比較樂天，覺得要時刻保持正能量，真係唔覺有特別難捱嘅日子，只會諗努力做好每個工作。我覺得係心境決定境界，其實難捱都係一個選擇，要經歷辛苦日子先會開心同珍惜。」
珍惜工作 不求上位
去年5月她有份隨無綫總經理曾志偉現身內地抖音網紅直播間，即被指成為無綫力捧小花之一，投閒置散的傳聞不攻自破，但她覺得「上位」與否都不重要，她說：「我入行到依家都只係知道要努力，享受任何工作過程，有冇上位都只係外界講，反而我希望畀更多人認識，亦想自己見識更多嘢。」
靚女有緋聞絕不出奇！林凱恩入行至今，先後跟《愛》劇拍檔周嘉洛及阮政鋒傳緋聞，早前又被指與圈外人Vincent拍拖，不過她已統統否認。她強調現時單身，專心工作，對感情隨緣。問到若拍拖會否公開？她說：「始終太多外來因素影響，冇話公唔公開，順其自然囉。慢慢學識同一個人相處係唔簡單，要慢慢去睇呢個人，所以當我都未肯定嘅時候，好難話畀大家知道。」
