衛冕有「卡」士 上盤「約」定你
亞洲盃決賽賀新歲
恭喜發財，明日大年初一晚即有亞洲盃決賽上演，想踏入龍年立即發個新年財，卡塔爾上盤應該幫到你！身為今屆賽事主辦國的卡塔爾，4強闖過伊朗一關，晉級過程一直表現平穩出色，今戰對手是爆冷踢走了韓國的約旦，論實力肯定以卡塔爾秤先，加上主場優勢，小讓平半，上盤抵捧！（HOY TV 77台周六11:00pm直播）
肩負衛冕重任的卡塔爾，現時世界排名58位，較決賽對手排名87的約旦高出29位，實力亦確實有距離。卡軍在分組賽3戰全勝未失一球，包括半力以1:0小勝中國，之後淘汰賽16強先贏巴勒斯坦2:1，8強對烏茲別克靠互射12碼險勝過關算是有驚無險。至於4強戰反勝奪標熱門伊朗則是純實力表現，今屆賽事無論對勁旅弱旅都有辦法，證明卡塔爾確有真材實料。
主隊阿菲夫爭做神射手
射手阿菲夫是卡軍爭勝的王牌武器，至今已入5球，在射手榜只落後伊拉克的艾曼侯賽因1球，如能以入波帶領球隊奪標，兼得神射手，將會大豐收，鬥志肯定有保證。球隊中場法菲因為累積黃牌夠數，今場停賽，但同時會有梅尼亞波監刑滿復出，實力未受影響，更添勝算。
對手約旦在分組賽僅以其中一席最佳第三出線，表現普通，到淘汰賽三輪都在法定時間贏波，表面贏得清脆，但老實說在16強對伊拉克之役，補時入兩球奇跡反勝都有不少運氣成分。更重要一點，無論在對伊拉克及4強戰對韓國，約旦都是踢下風波主打反擊贏波，今輪面對卡塔爾，對方卻會以穩陣行先，未必會過分搶攻，踢拉鋸戰或會考起約旦。始終今次是約旦歷來首次的亞洲盃決賽，經驗不足兼作客，注定難打。
