4字頭學舞 黃婉君再戰樂壇
全家支持 誓做有價值媽咪
曾紅極一時、來自馬來西亞的姊妹組合2R由黃婉君（Rosanne）與黃婉佩（Race）組成，2002年出道即奪新人獎，及後淡出娛樂圈各自擁有美滿家庭。姊姊Rosanne於2009年與混血牙醫老公結婚，育有一對兒子，她婚後不忘增值，獲家人全力支持闊別18年再戰樂壇！
採訪：記者 阿祖 攝影：萬霜靈
Rosanne接受本報專訪時表示：「我仲想做一個有價值嘅媽咪。」除了做親子KOL，更研發有機護膚品，去年又接韓星G-Dragon棒，成為韓國銷量第一防脫髮洗頭水亞洲區代言人，之後更激發她推出跳唱新歌《帥起來》。首次擔任監製、為自己製作歌曲的Rosanne說：「我作為女性尤其係媽媽，覺得唔係老咗就唔使學新事物，我都係踏入4字頭先學跳舞，之前疫情學咗一年多跳舞，當聽到人話你好弗，又識到好多新朋友，發覺人生變得更精彩同有活力。」
重入錄音室，Rosanne覺得與妹妹Race組2R時有很大分別：「以前我哋喺環球唱片，算係最細嘅𡃁妹，同公司有張學友、張柏芝、李克勤、陳慧琳，嗰時大約每3個月出嘅歌只得20首，佢哋會揀晒最Hit嘅歌，剩番啲『餸尾』畀2R揀，有時啲歌唔係好鍾意都要揀。所以依家我做監製，可以做我想做嘅嘢，會有自己Style，少少偏韓風。」
老公歌癮更大
新歌推出後，勾起樂迷對2R的回憶，但仍未見MV面世，Rosanne解釋：「因為我學跳舞一年多，平日都係同一大班人跳，依家編排舞蹈進度唔會好快，體能上我可以應付，平日我有陪小朋友行山、游水，只係未習慣邊唱邊跳，記得舞步就忘記唱歌，所以好佩服跳唱歌手。」
相隔18年再唱歌，Rosanne表示再入錄音室沒有生疏感覺：「第一次2R入錄音室，拎住耳筒聽到自己入咪把聲，覺得好奧妙，同平時講嘢好唔同。今次再聽到自己把聲，感覺係我可以再唱歌，係屬於我嘅Ｍoment。」她坦言有歌癮，不過笑指老公歌癮更大：「其實今次我全家人都係監製，因為最初《帥起來》原曲係一首中慢板歌，但老公同囝囝聽完覺得唔夠Feel、唔夠勁，話我上台可以咁樣唱，咁先改成快歌。我老公本身鍾意聽歌亦鍾意唱歌，都有話我唱到佢要求嘅水準。就係老公鍾意唱歌，先會娶我嘛。」
