蕭正楠演繹渣男 背住吳若希出軌
《奔跑吧！勇敢的女人們》拜神儀式
蕭正楠於新劇飾演渣男角色，他笑言現實中不會發生，因為他與太太黃翠如婚姻美滿，出軌情節只會在劇中發生。有份演出的吳若希則狂讚老公顧家，實行與阿蕭鬥放閃！
蕭正楠、吳若希（Jinny）、朱敏瀚（朱仔）與賴慰玲等昨日出席新劇《奔跑吧！勇敢的女人們》拜神儀式，Jinny與阿蕭於劇中同是明星，雖然結婚15年、但女方依然是阿蕭的頭號粉絲，瘋狂迷戀對方，每次見「偶像老公」都會尖叫，阿蕭說：「本來Jinny紅過我，但佢未紅前我係同賴慰玲一齊，一個真愛，一個係愛的責任，我周旋佢哋之間。睇劇本覺得好有難度，自己現實中婚姻美滿，演嘅時候都幾難，好違背自己，哈哈！」
阿蕭笑言劇中的渣男角色現實中一生都不會出現，只會出現在劇中。問到老婆黃翠如是否崇拜他？他笑言：「唔使講啦，仲瘋狂過佢（Jinny）。（現實中有冇遇過瘋狂粉絲？）做歌手嗰陣有，會郁手郁腳咁。」Jinny表示做了人妻後就沒遇過瘋狂粉絲，然後狂讚老公：「我老公又叻反應又快，照顧我同頭家都幾好。最近我開劇少咗時間照顧仔女功課，佢會主動幫忙。」
賴慰玲預告性感
阿蕭透露劇中有一場接近全裸的戲，會在Jinny面前僅穿底褲，他說：「好唔慣喺女仔面前着底褲。」Jinny笑言：「我睇慣！」蕭正楠無奈說：「但我唔慣俾人睇，好彩近排瘦咗，唔使俾你笑。」Jinny亦稱有一場穿喱士睡衣的戲：「可能我胸前比較偉大，大家都想我着睡衣出場。」
劇中大部分演員都高人一等，嬌小的賴慰玲穿5吋高跟鞋現身，拉近與眾人的距離。她透露劇中的四角戀關係錯綜複雜：「我原本同阿蕭拍拖，但之後Jinny未婚有咗，兩個人就結婚，但我同阿蕭仲藕斷絲連，朱仔同Jinny抱不平，之間有好多角力，朱仔仲做經理人簽咗我同阿蕭。（你係小三？）可以咁講，但我係嚟先。」她指今次角色比以往較有女人味，激罕穿性感晚裝：「啲衫幾靚，化妝髮型都好靚，我哋完全唔使煩。」
朱仔自爆拍這套劇有遺憾：「劇情講我揸電單車，之前我同賴慰玲、張振朗去澳洲拍旅遊節目返嚟，我哋都話要考電單車牌，點知最近考強制試齊齊『肥佬』！我衰有自信，賴慰玲衰掃冧晒雪糕筒，搞到依家拍電單車戲要用替身，但我哋嚟緊會再考，希望考到。」
