丁子朗圓男團夢 冼靖峰舞力全開
參加《亞洲超星團》求突破
丁子朗（丁丁）和冼靖峰（Archie）參加偶像選秀節目《亞洲超星團》後曝光率超高，二人作為香港代表之一，歌舞都不算精的丁丁自爆曾被公司勸退參加，怕他會出醜失禮公司；Archie則希望藉今次比賽帶給觀眾娛樂及衝擊，他不想被定型。
採訪 梁靜儀 攝影 黃艾力
現年26歲的丁丁和25歲的Archie分別參加《2016年度香港先生競選》及第一屆《聲夢傳奇》入行，二人再次參加比賽，目的只有一個，就是想挑戰及突破自己。近年備受TVB力捧、已是劇集男一的丁丁，當日公布他是《亞洲超星團》65名練習生其中一位時，不少人都感到愕然！丁丁表示再次參加比賽，目的除了是自我挑戰外，主要是他從小就有一個男團夢：「我細個超級鍾意男團EXO同女團少女時代，佢哋影響到我讀大學時學韓文。加入TVB後我都係主持同拍劇，好似遺忘咗男團夢，難得有機會，梗係盡地一煲試吓，而且我後生，自私啲去諗，投資半年時間比賽，衰咗就再嚟過，呢個『禍』我闖得起。」年輕就是最大本錢，機會可一不可再。
公司擔心出醜
在TVB已7年多的他，不諱言很怕習慣安於現狀而令自己失去衝勁，今次比賽就是要作出改變，覺得這是個天衣無縫的機會，於是自薦參加，就連經理人及高層樂易玲都帶有疑惑問他：「你真係要參加？」因公司擔心其定位及怕他出醜，畢竟是代表香港及TVB。憑着一股幹勁及大無畏精神，丁丁順利入圍，成為65名練習生之一，他亦專誠找唱歌老師增值。
Archie亦再參賽，他說：「兩個比賽性質唔同，一個以唱歌為主，另一個係選秀，係跳舞加唱歌，上次《聲夢》係Solo，今次係男團形式做一個比賽，期間學到嘅嘢都有唔同。」談到參賽的目的，他自知舞技不精，加上好想突破自己，於是就用這次比賽作為一個契機，逼迫自己膽粗粗試鏡。當然Archie是有備而來，事前他特別找老師一對一受訓，誠意十足的他最終入圍。
二人在上海接受4個月地獄式訓練，丁丁發現男團生活跟其認知不一樣，生活節奏是如此緊湊。他自爆初到埗時因不習慣生活模式而想哭：「最辛苦唔係排練，而係完全冇私人時間，返到房有室友，出到房有隊友，連自己想喊嘅機會都冇！有情緒時想打電話畀屋企人傾訴都少咗，唯有匿入廁所打畀阿媽。」丁丁受訓期間有時會因一首歌唱得不好，或一隻舞跳得不好而氣餒，但又求助無門，因為手機被沒收，加上當時一個朋友都沒有，但又要找到自己抒發情緒的方法而又在這件事上做得好，對他來說的確是最辛苦最大挑戰，後來就慢慢適應。問到可有致電緋聞女友郭柏妍訴苦？丁丁避談說：「半年前咁耐嘅事，唔記得喇，第一個打畀阿媽。」
唔敢搵家人訴苦
Archie認為受訓期間最辛苦的不止是應付比賽，還有身體狀況，他最初到埗時因水土不服，試過發燒至38.9度，最終要入院醫治，之後比賽期間又一度失聲及練舞時弄傷左邊大髀筋。不過他未有向家人訴苦，因不想令家人擔心，但能得到超星總製作人、韓國殿堂級偶像Rain點名讚賞歌聲動聽，Archie覺得一切辛苦都是值得，他謙虛說：「自己都知係傾向唱歌多啲，跳舞好多地方要改善。」深信自己仍有很多發揮空間的Archie，希望可找到更多進步空間。
