泰國硬淨 強「細」抗沙特
今晚亞洲盃分組賽全部結束，壓軸的F組深夜上演最後一輪，當中沙特阿拉伯與泰國踢榜首戰。沙特雖然兩戰兩捷，但演出欠缺強者本色，嚴格來說並不對辦。遇上連仗表現皆硬朗、至今未失過波的泰國難攻得入。考慮到兩軍都已晉身16強，今仗隨時會為淘汰賽有所保留，推介[2/2.5]細盤。（HOY TV 77台周四11:00pm直播）
沙特在名帥文仙尼帶領下風波不斷，即有主力戰將拒絕入選，陣中亦疑似有球員對他不滿，陣上未見賣力。首場分組賽對阿曼表現懶懶閒，落後下去到補時才靠一個VAR覆核良久的入球驚險反勝；上仗面對弱旅吉爾吉斯，對手上下半場開賽後各有一人被逐，11個打9個亦只能毫無說服力地小勝2:0交差；泰國贏吉爾吉斯及賽和阿曼，表現都見明顯進步，防線硬淨鬥志一流外，門將柏迪威屢救險球，有信心頂住牌面高得多的沙特。
