買樓最緊要識得入場
湯文亮博士 紀惠集團行政總裁
賭仔贏錢最緊要識得離場，否則最後都會做輸家。股票也是一樣，一些人買中了一兩隻當炒股，但唔識兌現離場，當那些股票跌低過買入價就會非常後悔·並且答應自己如果股價回升，一定會兌現離場，當他們的美夢成真，已經是很多年之後的事，或者那些人早已賣走手上股票，所以，贏咗錢識得離場對一個賭徒或者投資者是非常重要的。
不過買樓就有多少不同，千祈唔好以為買了樓之後賺了錢要識得離場，其實唔識離場仲好，因為樓價即使有波動都會是短期性的，長遠來說，樓價大多數上升，甚至升幅驚人，如果太早賣走，真係後悔莫及。而事實上樓市是沒有賺了錢要識得離場這回事，因為樓市長升長有，今日賣走，明日又會後悔，所以，樓市是賺了錢最緊要識得入場而非離場。
能夠入場一定是贏家
假設有一個兩年前已經打算買樓的人，但遲遲未有行動，現在樓價比他當日打算買樓的時候已經下跌了兩成，如果他今日買樓就會慳了不少錢，問題是他是否願意入場，如果認為樓價會繼續下跌，堅持唔入場，當他日樓價回升，他的利潤不但會消失，甚至可能要付出更多樓價，當然，樓價亦有機會繼續下跌，那人可能贏得更多，情況同那些贏咗錢不願意離場的人一樣，認為可以繼續贏落去，但最後又要同人吐苦水，早知今日買樓，付同樣樓價可以買多一個房間，所以，打算買樓的人現在最緊要是識得入場，因為能夠入場一定是贏家，最多贏少一些。
