Twins新歌呼應《風箏與風》 好姊妹容祖兒驚喜獻聲
香港文匯報訊 成軍22年，Twins於明日展開一連十四場《TWINS SPIRIT演唱會》，演唱會前，二人率先為樂迷送上全新廣東EP《WE ARE TWINS》，當中歌曲《夢想與夢》亦於昨日上架，新歌是呼應《風箏與風》，展示Twins多年來在演藝路上，保持熱誠的初心不變。
《夢想與夢》歌詞充滿心思，二人好友容祖兒更驚喜獻聲。新歌MV赴台灣取景，亦出現不少呼應《風箏與風》二人於山頂放風箏的畫面，是滿滿的回憶殺。Twins訴說這22年的旅程，就像做夢一樣，「《風箏與風》呢件事係一個開始，但係我哋現在着得好華麗、好唔一樣，回想返，好似經歷咗好多，好似發夢一樣。可以維持到咁多年，其中一個係呢個本身就係我哋嘅夢想。其實今次呢個MV有一半係一個夢境嚟嘅，我哋現在着住呢套衫係喺夢境入面嘅服裝。後尾去返現實，就係去放風箏。」
明日開騷 阿嬌緊張手震
睽違6年再次推出實體碟，阿Sa表示現在很少人會出實體碟，「因為我以前細個嗰年代係鍾意實體碟，攞住隻碟好開心，同埋又適逢演唱會，希望大家鍾意。」她表示今次音樂班底十分新鮮，「因為有一啲新嘅班底，又有一啲合作過好多次嘅音樂人，大家碰撞到出嚟嘅火花都幾新鮮。」歌詞方面，雖然二人沒有給出明確的方向予填詞人，但大家都不約而同地寫出相似的東西，「因為佢哋都見證住我哋嘅成長，佢哋係喺佢哋嘅角度去寫我哋，睇到係好感動。」阿嬌則謂EP中的歌曲跟以前很不一樣，「我哋由出道到現在每一張碟都嘗試咗好多嘢，今次都有好多新嘅元素，亦都有回憶，因為我哋開演唱會，都想有新嘅作品帶畀大家，咁耐冇出廣東碟，希望可以有廣東歌，又可以配合返我哋嘅演唱會，畀一個新嘅感覺畀大家。」
明日演唱會正式開鑼，二人都表示準備就緒，阿嬌坦言開始感到壓力，「有少少緊張啦，開始有少少手震，哈哈，有少少瞓唔着，有少少壓力，OK嘅。」阿Sa則謂：「要準備嘅嘢都準備好㗎啦，現在係要好集中將所有嘢全部擺埋一齊。」
