讚靚湯扮嘢叻 馬明力薦拍喜劇
為親戚在港補擺喜酒
馬國明昨日出席新劇宣傳活動，被問會否想學陳豪與陳茵媺夫妻檔拍劇？他坦言不抗拒與老婆湯洛雯合作，但最怕忍不到笑，並大讚老婆摸仿能力超強，扮乜似乜，力薦她拍喜劇，「如果遇上好劇本、好角色，相信老婆必定爆紅！」
馬國明、蔡思貝、高海寧與劉穎鏇等昨日到油塘宣傳無綫劇《飛常日誌》，馬明於劇中跟蔡思貝、劉穎鏇有感情線，被取笑艷福不淺，他表示與劉穎鏇較少對手戲，希望日後再合作：「我老婆（湯洛雯）成日話佢（劉穎鏇）好正，身材又均勻，又成日讚內地演員肖戰，因為佢近排鍾意睇仙俠劇。（呷醋？）唔會，每個人都有偶像。（你係靚湯偶像？）都係㗎，佢好鍾意睇我嘅《On Call》，上年又鍾意我套《隱形戰隊》。」
問到可會夫妻檔拍劇？馬明笑言：「要問佢，同埋唔知有冇監製夠膽好似搵陳豪同陳茵媺咁搵我哋拍，我就唔抗拒，但要睇劇本，我係驚佢同我拍會忍唔到笑。（拍喜劇？）可以呀，佢模仿好叻，睇睇吓電視會突然模仿人，仲要好似，如果撞啱個角色可以畀佢發揮會好爆。」提到他們上周在港秘密補擺喜酒，馬明稱是雙方家長決定：「因為我哋蘇梅婚禮冇請親戚，雙方家長覺得補番親戚影相，會圓滿啲。」
蔡思貝哮喘復發
蔡思貝於台慶頒獎禮坐足全晚卻「食白果」，她坦言沒有失望：「最感動係見到大家嘅努力得到認同，見到佘詩曼更加會以佢為榜樣，佢好叻，一返嚟拍劇就留低好多紀錄，唔係個個都做到。」她受訪時不停咳嗽，她坦言哮喘復發：「近排天氣一冷一熱，細個有哮喘，呢排有少少翻發就咳唔停。」剛在台慶頒獎禮奪「最佳女配角」的高海寧聲音沙啞，她表示當晚便生病，故仍未慶祝生日及得獎，她說：「要到2月農曆新年先有時間慶祝，到時叫一班朋友順便慶祝新年。」
同場的《聲夢傳奇》何晉樂（Rock）日前遭前後援會會長炮轟，不滿他為後援會退會費問題而公開其名字，Rock受訪時表示：「因為唔清楚說話嘅內容，所以交畀公司回應。如果有進一步嘅事，對方又願意提供，可能問當事人比較適合，我唔作回應喇。」
