今日才買樓是贏家
湯文亮博士 紀惠集團行政總裁
有一個打算買樓的年輕人同我講，兩三年前已經可以買樓，但擔心樓價下跌，好彩冇買，樓價比他打算買樓的時候跌了兩成，現在是否應該買樓？不過他仍然擔心樓價仍然會下跌，現在買仍然會輸很多錢，但唔買又擔心政府在放寬辣招之後，又優化專才稅，令到買樓的人止跌回升，今日唔買，以後又要買貴樓。
我見到不少類似的人，但結果他們都冇買樓，因為如果打算買樓，是不會同其他人講，別人為了保障自己，只會話現在樓市形勢仍未明朗，不少專家話樓市仍然有下跌空間，而大行又估計今年樓價會下跌一成，現在買樓，可能接別人火棒，倒不如睇定形勢再出擊，那些人講得冇錯，但於事無補，甚至會打擊買樓人士信心，所以，打算買樓的人只會偷偷地去買，買完之後都唔會同人講，否則有可能俾人嚇到撻訂。
買樓唔好擔心樓價跌
我對年輕人講，他能夠守到今日才買樓已經是一個贏家，如果有需要又負擔得起，遇上一個合適的單位應該果斷去買，好似追女仔一樣，既然是單身，對方又適合自己，點解唔追？至於樓價會唔會繼續下跌，我當然話唔會，但其他九成人都話會。現在買樓唔好擔心樓價下跌，而是已經贏了兩成樓價，唔使落注有錢贏，一生人都未必遇到。
我以為年輕人聽完我講之後會的起心肝去睇樓，原來我誤會，年輕人話覺得樓價仍然有下跌空間，所以暫時唔會買樓，我錯了，我唔記得那些打算買樓的人是不會同其他人講的。
