阿佘劇酬照舊 想再演女王
黃宗澤講漏多謝樂易玲急補鑊
《萬千星輝頒獎典禮2023》前晚圓滿結束，一如賽前所料，《新聞女王》掃8獎成劇王，佘詩曼更創造歷史封3料視后。她坦言只要劇本好，會繼續為TVB拍劇，期待原班人馬拍《新》劇續集。她又指不會因為攞獎而提高身價，覺得跟團隊一齊努力炮製出色劇集，才是她最大滿足感。
頒獎禮結束後，阿佘受訪時表示感覺似發夢，心情仍未平復：「個心仲卜卜跳！」提到《新聞女王》掃8獎成大贏家，她坦言最開心是攞「最佳劇集」：「由高海寧第一個攞獎，我已經忍唔住喊。」她笑言昨晚太感動，不知喊了多少次。提到在林峯與楊茜堯手上攞獎，她說：「估唔到林峯咁口密，佢真係冇講畀我聽佢會嚟。」問到是否想盡快再拍無綫劇？她坦言期待拍《新》劇續集，又指不會因攞獎而提高身價：「大家團隊做一個project已經係贏咗，對我嚟講已經賺晒，其他嘢唔講，淨係呢份友誼已經抵晒。」
陳豪相隔16年憑《破毒強人》再膺視帝，他笑言自己的紀錄無人能打破，因他提名過28次視帝：「依家證明咗我對做戲嘅熱愛同追求係正確，我覺得呢個係一個獎勵。」入行15年的高海寧首奪 「最佳女配角」，她受訪時表示心情激動，沒想到節目一開始就頒女配角獎，完全沒心理準備。她語帶激動指首次在公司得獎，過年會帶獎項到內地送給婆婆及天上的公公和爺爺。
馬國明獲陳豪贈大利是
馬國明雖失落視帝，但未有介懷：「幾乎全晚獎項得主我都貼中，唯獨冇貼自己攞獎。最開心係陳豪同林子善得獎，因為陳豪喺台慶封咗一封大利是畀我，所以我睇好佢。」提到他在台上表示太太旺夫，他笑言去年真的很旺，尤其沒想過「最佳衣着」能勝過陳山聰，歸功太太幫手揀衫。黃宗澤成為首屆「大灣區最喜愛TVB男主角」得主，他受訪時即補鑊稱在台上忘記多謝樂易玲，因沒想過得獎，故沒準備感言，揚言以後樂小姐叫他做什麼或者加簽約作賠罪也可以。
擔任頒獎嘉賓的羅嘉良與林保怡表示以前雖然在同一公司，但未曾真正合作，希望有機會與苗僑偉合作拍TVB劇，做串燒三兄弟。有傳林保怡相隔13年重返TVB拍《刑偵12》，他坦言去年收到通知，上月收到初稿，現時看劇本，雖未答允演出，但強調與TVB一直關係良好。
