馬明視帝大熱 有網民撐腰
單立文入圍男主角10強 老婆唔開心
無綫《萬千星輝頒獎典禮2023》將於周日舉行，於《破毒強人》演「毒王」的陳豪有破格演出，劇集推出後被視為視帝大熱，不過隨着台慶劇《新聞女王》成為年度熱播劇，飾演「佐治」的馬國明亦不容忽視。早前無綫官方社交平台專頁公布視帝10強名單中，馬明所得Like數便力壓陳豪排第一！
《萬千星輝頒獎典禮2023》大會昨日發布「最佳男主角」及「最佳男配角」的10強官方場刊照。今年視帝之爭相當激烈，陳豪、馬明與陳山聰被視為大熱，從網上支持點讚數字看，暫時馬明力壓陳豪排第一，陳山聰緊隨二人之後排第三。
10位入圍「最佳男主角」早前拍攝造型照，單立文受訪時搞笑表示被通知入圍視帝10強時，一度以為被大整蠱，又爆老婆胡蓓蔚不開心：「我以為公司搞騙案呃我，到我老婆話網頁登晒出嚟，又有人恭喜我，我先開始相信。我老婆點？佢唔開心呀！佢驚我攞咗之後會唔要佢，佢好有危機感。」
林子善投票畀馬貫東
男配角方面，陳山聰於《新聞女王》演輕度弱智爸爸入圍，他直言最大對手是好友林子善，因對方在《隱形戰隊》的表現令觀眾留下深刻印象。林子善則說：「入到10強，個個都強，我唔會投自己一票，雖然我想，但我又好欣賞某位演員，佢未必同我好熟，係馬貫東，我直情當面同佢講『我好鍾意睇你做戲』，所以我今年投畀佢。」第3次入圍「男配」的馬貫東抱平常心，但對自己今年成績感到滿意，因為角色令觀眾看到他和以前有很大分別。
至於憑《新聞女王》首度獲提名「男配」的吳業坤直言睇好陳山聰：「我睇住佢做戲真係好犀利，當時佢趕拍兩部劇，一收工後就趕過嚟，佢每個鏡頭都用盡100%，我要向佢好好學習。」
