馮盈盈煞停學業 專心做女一
唔係靠證書搵食
馮盈盈首次擔正演女一的新劇《妳不是她》，劇情以奇幻懸疑和貼地角度探討「何謂真愛」，內容全是百分百純港式的現代愛情小品。盈盈與丁子朗（丁丁）劇中飾演情侶，反映現實情侶的日常，尤其處理表情和對白的反應都很寫實。她坦言為拍此劇，甘願延遲學業，因為她難以同時兼顧讀書和工作，並笑言不是靠證書搵食。
文、攝：記者 達里
踏入2024年，盈盈將會完成其碩士課程，她記得當初報讀課程後，才收到通知要接拍《妳不是她》，所以拍攝頭一個月很辛苦，要同時兼顧學業和工作，令她吃不消，她說：「最後我決定先延遲學業，拍完劇再去讀書，所以原本係舊年畢業，但依家仲有半個學期要完成。」盈盈稱不介意比其他同學遲畢業，因為她不是要靠證書搵食。至於今年將會踏入30歲，盈盈打算相約幾位圈外好友去旅行，地點將會挑選很少人選擇的地方，她說：「我哋想去充滿異國風情嘅地方，例如北非嘅摩洛哥，我哋都想去欣賞撒哈拉沙漠，相信大家平時旅行都唔會去呢啲地方。」
演港女等如做自己
首次擔正演女一，而且角色有兩個性格，盈盈直言挑戰性相當大，她說：「因為兩個性格係截然不同，一個係沉默寡言偏文靜，另一個就熱情奔放，係大家嘅夢中情人。」盈盈表示角色因遇上車禍致性格有變，令她與丁子朗的3年感情發生變化。提到與丁丁同年出道，分別參加2016年香港小姐和香港先生入行，盈盈表示與丁丁特別有默契，因為當年參選經常有聯合活動，很早已經熟絡起來。不過，《妳不是她》是盈盈與丁丁首次合作，她大讚對方：「佢為人好純真可愛，雖然年紀比我細3年，但我哋呢個配搭都幾新鮮，佢又坦誠，係一個好容易親近嘅人。」
問到對劇集有什麼期望？盈盈說：「角色前期係好『港女』，木無表情又黑口黑面，連我細佬都話我其實演番自己，因為我平時喺屋企就係咁嘅樣，好Cool好惡。我哋嘅情侶嗌交戲都好真實，係大家平時會講嘅對白，希望觀眾睇完會有共鳴。」盈盈稱想過劇集會安排在情人節檔期推出，但可能跟農曆新年太近，便改在聖誕播出。對於要接替人氣劇《新聞女王》播映，盈盈笑言完全沒有壓力，因為兩劇題材完全不同，根本無法比較。
劇情賣點是情侶的日常生活，少不免有大量親熱鏡頭，盈盈笑言：「我哋差唔多每兩集就錫一次，不過劇集唔係要灑鹽花，因為係愛情小品，以純愛情做主打，所以會做出所有情侶之間都會做嘅事，想百分百呈現畀觀眾睇。」盈盈指劇集想帶出的訊息，是不論任何年齡階層都可以擁有愛情，即使是老夫老妻也可以有甜蜜的一面。問到盈盈現實中的愛情故事，有沒有與劇情相似？她說：「劇中會講到丁丁拋棄我，令到我好心碎，之後大家會諗番對方，諗吓當初大家會走埋一齊嘅初心。」
致敬韓劇 絕非抄襲
盈盈稱大學一年級時曾對一位學長有好感，可惜當時「神女有心，襄王無夢」，但這段青澀的感情依然讓盈盈刻骨銘心。她又稱大部分劇情自己沒親身經歷過，只好參考其他劇集來演：「監製有推介我去睇韓劇《經常請吃飯的漂亮姐姐》，係孫藝珍做嘅，我哋劇集有好多向呢部劇致敬嘅地方，但絕對唔係抄襲佢哋。」
問到與丁丁合作哪一幕比較難忘？盈盈坦言是被對方拋棄的一刻，她說：「因為情緒上較複雜，要有難捨難離嘅感覺，都要靠自己去幻想被人拋棄嘅感覺係點。」
