減辣令大灣區樓價跌
有日中午與幾個來自珠海的朋友食飯，在未人齊時問其中一個，近日傳聞珠海樓價大跌，買入價600萬單位，現在連280萬都賣唔走，究竟有冇此事，是否傳媒老作。
珠海友人話，唔敢講是真是假，不過近日珠海樓價的確下跌了很多，而且是冇人買，估計仲有得跌，不止珠海，深圳、中山等亦有同樣問題，啲人唔係冇錢，而是香港減辣之後，他們唔需要畀30%印花稅，不如嚟香港買樓，香港樓有多功能用途，除了度假之外，又可以用作家族辦公室，甚至小朋友在香港讀書，亦可以作為居所，一室幾用，點解唔買，他們今次嚟香港都是睇樓，合心水可以即刻落訂，已經有幾個朋友買了樓，賣樓畀他們的香港人日後一定會後悔，日後一定會叫香港政府復辣，復婚我聽過，復辣就第一次聽，希望唔會。
停止賣地冇得執死雞
講開又講，有朝早去到茶餐廳，有客人話，政府停止賣住宅地，代表地產商手上的存貨或者未興建單位較容易銷售，基本上可以講是求仁得仁，但點解有地產商話不理想。老闆話，生意人最好就是成本平，售價高，地產商唔入標，或者入非常低的標，目的是將地價壓下來，當政府接受低標價，亦代表接受低補地價，現在政府不再招標，代表不會接受低補地價，地產商買唔到平地，所以話停止賣地是不理想，最理想就是低價賣地，接受低補地價，地產商成本就會大幅減輕。
