炎明熹Ready拍拖 靜待天賜良緣
炎明熹（Gigi）、李爾晨、海俊傑與張美妮等，昨日在馬鞍山拍音樂劇《戀上西沙》。Gigi透露與李爾晨於劇中有一段曖昧關係：「我覺得幾浪漫，因為未試過，所以有啲緊張，會掂吓手仔，但就梗係冇錫錫啦，因為每個人嘅戀愛都唔一樣。（你心目中嘅戀愛係點？）大家過住平淡日子都可以好開心，唔一定要大起大跌，唔一定要製造驚喜，感受到愛對方嘅愛意就足夠。」
正讀大學的Gigi坦言沒人追求，靜等天賜良緣。問到可有合眼緣的男同學？她說：「暫時專注學業，可能見同學嘅機會唔多，因為分組都係嗰班同學，同埋呢科女仔多。」已18歲的她被問是否準備拍拖？她說：「隨遇而安，一直等緊呢個機會，睇吓有冇天跌落嚟嘅一個人，要命中注定嘅。」問到有何擇偶條件？她說：「最緊要性格好，可能會係性格魅力吸引到我，我一定唔係睇樣先。」
