TVB復辦盆菜宴 兩晚筵開近300席 主席許濤宣布將加薪 提振士氣
香港文匯報訊（記者 梁靜儀、攝影 彭子文）無綫一連兩晚於將軍澳電視城舉行職藝員新春盆菜宴，兩晚共筵開約300席，董事局主席許濤在抽獎前上台致詞，並宣布TVB決定今年加薪的好消息；總經理曾志偉表示將停止裁員增聘人手。
主席許濤表示：「每一年去到呢個位，我心情都有少少緊張，因為要上台同大家講少少嘢，又要抽獎，今年唔例外。大家都知道過去嘅2023年香港經濟，或者我哋從事嘅電視廣播業務，經營都係非常困難嘅一年，縱使係一個經營困難嘅客觀環境裏面，TVB都做出非常亮麗嘅成績，係值得大家驕傲，而呢啲驕傲背後，係每一個同事用心去做每一件事，借用獎門人一句說話『觀眾係睇到你有冇用心去做你做嘅嘢。』雖然公司嘅財務表現未完全翻身，但係喺2024年，我睇到無論係廣告合作或最近節目同內地平台啲溝通，我好有信心2024年係TVB翻身嘅一年，因此我代表董事局話畀大家知，今年我哋決定有得加薪，希望呢個消息夠晒㷫烚烚，我們2024年會比2023或前幾年更好﹗」全場聞言拍掌歡呼。
志偉稱停止裁員增人手
總經理曾志偉受訪時直言加薪幅度好小，至於今年會否向員工發放雙糧，他就帶笑說：「有啲嘢可以同大家商量吓嘅，我講啲嘢唔算數，主席講先算數，我都係嚟聽。」早前TVB裁員，志偉表示裁員行動會停止，反而要增聘人手：「新一年有好多綜藝節目及劇集製作，又同好多單位合作，𠵱家要增加人手，希望請返啲年輕人，台前幕後都要，要培養多啲新人。」
昨晚出席盆菜宴的藝員有何廣沛、劉穎鏇、鄧智堅，應屆港姐冠軍莊子璇、吳偉豪與爸爸吳大強等，吳大強更打頭陣上台表演邊吹口琴邊唱歌，而丁子朗及冼靖峰等「亞洲超星團」學員，則即場載歌載舞，炒熱全場氣氛。至於有份角逐台慶頒獎禮的何廣沛、劉穎鏇、鄧智堅及許文軒等人，亦有上台拉票。
何廣沛主力爭「男配」
何廣沛今年分別憑劇集《你好，我的大夫》入圍角逐「最佳男主角」及憑《破毒強人》和《新聞女王》，同時入圍角逐「最佳男配角」，不過他就睇好自己得「男配角」獎，他說：「因為每年競爭都好大，同埋自己好鍾意《破》劇個啞巴角色，接拍嗰刻已經知道難度好高，一句對白都冇，只可以做手語，呢套劇我私心好鍾意，奈何我有份參演嘅《新聞女王》人氣勁，所以手心手背都係肉。」他直言面對馬國明及陳豪兩位強勁對手，自己冇可能跟他們鬥，所以「最佳男主角」會投《破》劇的陳豪一票，而「最佳女主角」就一定投給《新聞女王》的「Man姐」佘詩曼，基本上是全港人的心水。問到是否已訂好位慶功？廣沛笑言交畀Man姐，不過要是得獎都會請食飯。
劉穎鏇過去一年劇接劇，並憑劇集《隱形戰隊》入圍角逐「最佳女配角」及「飛躍進步女藝員」，對於2023年的成績，她坦言相當滿意，最想《隱》劇得「最佳劇集」，因劇集對她來說有好大突破，令到好多觀眾認識她，至今出街仍有人會叫她的角色名，是好開心的事，加上劇集拍攝期長達五六個月，台前幕後的付出比起其他更重要，希望劇集有獎讓大家可以聚埋慶祝。距離頒獎禮不夠10日，劉穎鏇表示當晚的戰衣仍在趕工中，會是藍色的打扮。
莊子璇化妝變靚拒整容
另外，應屆港姐冠軍莊子璇首次參加盆菜宴，她感到好緊張，因為好多人都不認識。正在大學修讀營養學的她，表示仍在假期中，月底才返學，正準備畢業論文。問到可有信心順利畢業？她卻說：「有啩？」談到再被指整容，她不諱言有留意到報道，並說：「可能大家覺得我太唔靚，靚少少就覺得整容。（即係冇整容？）冇呀，我有留意大家覺得我邊個位唔好睇，就會喺嗰度化妝化多啲，我有睇網民話我打鼻翼針，有這種針？我真係唔知。（如果有你夠唔夠膽打？）打針我真係好驚，我唔可以確保以後都唔會，但現階段唔需要。」
