紅館騷破紀錄增至14場 Twins稱退休都不解散
香港文匯報訊（記者 子棠）Twins相隔9年再踏紅館，《Twins Spirit Since 2001 Live in Hong Kong》演唱會在本月21日開鑼，距離開騷尚餘兩周，鑑於加場之聲一直不絕，昨日再迎來三度加場的喜訊，大會宣布加開2月5日及6日終極兩場，由12場增至14場！
今次第三度加場，蔡卓妍（阿Sa）和鍾欣潼（阿嬌）異口同聲喊出：「嘩！今次真係破晒紀錄！14場！做完真係可以好似歌迷傳言咁光榮引退啦！哈哈！」工作人員叫兩人別說笑，阿Sa打趣道：「咁佢哋真係私信問我哋，係咪想解散嘛，笑死，我哋𠵱家加第13、14場，1314一生一世！Twins就算退休都唔會解散，我哋係一生一世嘅好隊友，Twins Spirit 係會長存。破晒紀錄做咁多場，唔係唔畀我哋農曆年『退』下來『休』息一下呀？放個長少少假都得啩。」阿嬌說：「係囉，1314，我哋都係一生一世。公司話係雙喜終極加場，歌迷應該最開心，因為我同阿Sa為大家爭取到，九成飛放出街賣。今次應該唔會再收到留言話買唔到，大家千萬咪去炒黃牛，等買加場，我又可以有飛補少少朋友債。」
為演唱會排練及keep fit ，阿嬌自言今次好醒：「我已經學好舞步，個人又瘦返，嘻嘻。各方面都進行得好好，所以對個演唱會好有信心，大家一齊期待啦。」阿Sa就話：「其實我由第一次開紅館，到今時今日，我每一次都當係最後一次咁做。好珍惜上台同大家相聚的機會，希望全力以赴，做到最好畀大家。不過今次就有一個仍未解決到的問題，就係咁多年來我哋演唱會都有握手位，今次我哋都好想有，因為好耐冇見歌迷，但係公司就出現好多反對聲音，佢哋好擔心我哋今次做14場咁多，驚我哋唔好好保護自己，近距離接觸咁多人會容易病，我同阿嬌𠵱家都諗緊，點樣可以有一個握到手又安全的方式去解決呢個問題，令歌迷又開心，我哋又開心，大家有咩提議？可以留言話我哋知。」
