劉德華 梁朝偉40年默契 最佳拍檔
互相信任 期待再合作
兩大影帝劉德華與梁朝偉繼《鹿鼎記》到《無間道》後，相隔20年於電影《金手指》再度合作，萬眾期待。兩人相識40年，雖然平日不多見面，但在片場埋位時已默契滿滿，每場對手戲都不用試戲，互相帶動對方演得更收放自如！
採訪：阿祖 攝影：黃艾力
華仔與偉仔合作電影《無間道》成為經典，20年後再合作《金手指》繼續對立，今次偉仔演反派奸商，華仔則演廉政人員。問到彼此默契會否仍在？偉仔說：「依然咁有默契、咁好玩，我同華仔一直合作得好舒服，可能大家相識咗40年！」華仔說：「佢好似細佬，感覺一家人。（有冇照顧偉仔？）佢犀利喇，個個都好照顧佢！」二人同是無綫訓練班出身，識於微時，多年來合作都能心領神會，一埋位就做到。偉仔直言跟華仔好有默契：「我哋合作第一部電視劇已做好朋友，可能好年輕已認識，建立出好好嘅關係，好信任對方，所以埋位好有默契，唔需要浪費時間去夾，去到現場就得。」
偉仔：改變代表成熟
華仔認同說：「加上我哋喺台慶都夾開，當年五虎相處係大家幫大家去諗，會將對方優點發揮出嚟，邊個有某方面缺點就幫手隱藏，亦可能成日要演出節目，好需要大家有個默契，好似踩單車，好記得當時做到個樣好犀利，但依家睇番其實……」偉仔搶着說：「好幼稚咁吖嘛！」華仔哈哈大笑後說：「就係經過呢啲日子，人同人之間嘅信任始終要有經歷同時間。」
今次再合作時，閒來可有話當年？偉仔表示沒有，不過印象最深刻是拍《鹿鼎記》，因跟華仔相對6個月，雖然辛苦，但很好玩。今次再合作，演出時可有覺得對方有什麼改變？偉仔說：「我相信所有演員都會做資料搜集同設計自己點樣去演，呢啲唔會改變，變就代表成熟，無論人生閱歷同個人經驗，甚至表演技巧上成熟咗，好自然覺得對方表演上無論感情同眼神都豐富好多，所以我哋每場戲一埋位都即刻可以做到。」華仔指其中一場法庭戲，劇本沒寫表情如何演繹：「但偉仔做得到喺審判過程中分幾個心態去演繹，所以每場戲我都好享受！」
偉仔今次演大反派，直言過足戲癮：「我未試過咁囂張、咁放、咁意氣風發，自己邊會咁，平時生活都冇可能。我未演過呢類角色，但都唔難拿捏，反而可以去得盡啲。導演莊文強設計咗幾場戲比較卡通化，突出我擺明講大話。」問他講大話叻唔叻？偉仔想了一會才說：「我氹人咪叻囉！都係善意嘅大話。」做演員都說反派好發揮，華仔今次演忠角又是否好難？他說：「我唔知難唔難，戲中角色有種幼稚嘅堅持，但偉仔嘅表演幫到我，因為好囂張同好放，令我（角色）覺得社會唔應該有呢種人，嗰份堅持係成立。」
對於什麼吸引偉仔演《金手指》，他表示有好多因素，因為今次角色未演過，他又好想再與華仔合作，更加上是《無間道》組合重新再拍一個題材，故沒考慮便答應了。
華仔曾受「偶包」掣肘
華仔坦言以前拍戲有包袱，現在則沒有。問到是否偶像包袱？他笑言：「我依家都係偶像呀！以前我會諗除咗『偶像』兩個字，仲會諗好多其他，反而唔能夠得心應手。依家覺得市場對我嘅信任度高咗， 我可以選擇多啲，等於我想同偉仔再合作，因為同佢演對手戲，畀我感覺佢好相信我嘅表現，我都會特別喺佢面前放任去演。」他坦言想過做導演，問到會否找偉仔演出？華仔說：「就算搵佢都要循正途，要有劇本。」二人仍想再合作，不希望再等20年，華仔說：「我哋有共識下次要做同一邊。」偉仔亦說：「都想再合作，但未有想法演乜嘢，總之做拍檔啦！」
