張家輝唔守規矩 好人最難演
呻被林超賢谷到爆裂
張家輝與梁洛施在電影《爆裂點》首度合作，二人異口同聲表示自己的「爆裂點」一定是親人，家輝更說為了女兒可以不惜一切。他以往演過不少反派角色都深入民心，今次角色設定是守規矩的警官，反而令他很難演繹，並自認內心有一個不守規矩的「張家輝」！
家輝與導演林超賢繼《魔警》後，相隔9年再次合作動作片《爆裂點》，家輝說：「佢勤力過後生嗰陣，我都估唔到，可能係佢發展得好，想拍嘅嘢多咗，野心大咗，每樣都想實行，就要畀多啲力，亦因為佢相隔9年冇拍警匪片，谷埋谷埋好辛苦，一次過將積落嚟嘅主意、想要呈現嘅畫面都放晒喺《爆》片。（谷爆埋你？）有，個個都爆！」
享受演奸角
家輝坦言現今年代有CG幫手，拍戲舒服得多，但受傷依然少不免。問到覺得哪一場戲最有難度？他說：「又唔講得上好難，反而覺得大家相隔咁耐又再拍警匪片，又有咁多新拍檔，題材又爆裂，大家享受拍攝過程，尤其係首次同林導合作嘅演員，個個都好似視死如歸。」
片中每個角色都因被人逼到絕路產生「爆裂點」，問到他們的爆裂點是什麼？已為人母的梁洛施說：「一定係屋企人，身為媽咪，觸發點一定喺細路身上。」家輝則認為每個人單獨受到不公平待遇都可以忍受，但若親人遇上就不可以，這算是大家的共同爆裂點。其中一幕家輝親眼目睹兒子燒焦的屍體，身為爸爸的他直言好崩潰。問到事後如何抽離角色？他笑言：「盡快返屋企早啲瞓，打咗10幾日，魂魄都抽離咗，拍完之後好似卸低咗個重擔。」
從影多年，家輝笑言忠角很難演：「以前經常聽到做戲一定要做正派，當時我對呢個講法好抗拒，直至後來我有機會演反派，例如《天地豪情》嘅Kelvin，我覺得做得好舒服，好理所當然，監製戚其義問我點演，我話會若無其事咁奸同埋殺人，出嚟效果好好。我一直覺得演灰色、黑化角色，發揮空間較大，正如我攞獎嘅電影《証人》都係呢類角色，我係享受。」談到《爆》片結局留下很多問號，若開拍續集，可想延續與梁洛施的感情？他說：「一定要啦，仲使講！」
現年59歲的家輝以往經常拍喜劇，提到近年他經常拍動作片，家輝無奈說：「我唔知點解開始咗武打演員生涯，我拍《爆》片之前喺內地拍咗兩部戲都係要打，返嚟拍林導，我都唔敢同佢講『喺內地打咗好多』，怕佢話要多啲。近年啲人主要搵我演好沉重又要打嘅戲，嚟緊啲戲都係咁，我又衰，好辛苦但又好鍾意，好矛盾，所以啲人睇到我呢個矛盾，就繼續搵我矛盾。至於以後拍唔拍動作片，要視乎劇本同班底。」
抗拒拍文藝片
從影三十多年，家輝由喜劇演員轉型拍動作戲，但仍無時無刻想轉型，問到最不想演什麼戲種？他說：「太淡口味嘅文藝片就最冇興趣，侯孝賢拍住個天空嗰啲我又唔得，太靜態我驚我領略唔到。（愛情片呢？）原本同梁洛施喺戲裏面有啲愛情成分，但因為我哋角色太忙，畀唔到時間應付，但林導嗰種唔止係談情說愛，大家因命運而走埋一齊嗰種愛情我就得喎。（韓國愛情片？）我做嗰啲心心（甫士）唔得㗎，返屋企會嘔，要食止嘔丸，我自己做唔到，人哋做冇問題。」家輝大讚梁洛施演的製毒師很出色：「可能大家對佢以前嘅印象都係斯文、靚女、文青，好有演戲天分，但唔會諗到佢係製毒師又會揸槍，現場睇到佢造型同角色都好好睇。」
