克爾蓄勢待發 澳洲夠贏丹麥
同日另一場16強戰，東道主澳洲於悉尼迎戰丹麥。澳洲王牌前鋒克爾已經準備就緒，今仗雷霆復出，足以擊敗技戰術略嫌粗糙的丹麥隊，澳洲主場讓半球、一球，推介上盤。（Now 630台周一6:30pm直播）
澳洲今次主辦世盃，主場球迷自然充滿寄望，但克爾在開賽前受傷，令球隊飽食驚風散。首仗面對專注防守的愛爾蘭，前線進攻並不流暢，最終只靠一個12碼罰球險勝；第2場面對尼日利亞搶攻更得不償失，被對手連番反擊導致意外輸波，令到最後一輪對加拿大非勝不可；克爾在對加拿大賽前已表明可以隨時候命，但球隊及時踢爭氣波，於上半場已領先兩球，克爾可以留力不必上陣。結果澳洲令人信服地大勝4球出線，士氣大振，克爾到今場淘汰賽復出，球隊更加如虎添翼。
丹麥分組賽不敵英格蘭，遇上中國及海地亦毫不輕鬆，攻守實力在淘汰賽明顯次一皮，面對主隊難偷雞。
