下巴變尖因仆親 陳星妤否認整容
《一舞傾城》微博話題突破4億閱讀量
由王晶擔任製作人、鍾少雄監製的《一舞傾城》自播出以來深受內地網友歡迎，在微博關於「一舞傾城」的話題突破4億閱讀量。其中陳星妤（Yvette）更憑此劇備受注視，為劇集獻出多個第一次，獻出熒幕初吻外，又要被瘋狂掌摑，並與準人夫關楚耀有床上戲，Yvette不怕會抽離不到角色，只怕被觀眾指她「發姣」。
現年28歲的陳星妤（前名陳聖瑜）於2021年參選港姐成大熱，但最終大熱倒灶只得「現場觀眾至Like佳麗」，後簽約TVB成為旗下藝人。出道後曾客串演出劇集《新四十二章》及《法言人》，直至最近在《一舞傾城》飾演舞小姐而備受注視。劇中她不乏大尺度的場面，其中一幕被繼父王俊棠侵犯的戲份，棠哥更拍到滴汗：「因為棠哥又要趴又要擒，佢怕我唔舒服，佢仲驚過我，好大壓力，加上棠哥老婆又在場。」
初拍親熱戲擔心被指發姣
劇中她又不停被人掌摑，更被劇中阿媽摑至耳鳴：「雖然事前大家有夾過，但冇諗過咁勁，不過出嚟嘅效果都唔錯，好真實。」拍完後令她掌握到拍被掌摑戲的要點，之後要拍被吳沚默掌摑時，就叫對方真心摑落去，「佢覺得我呃佢，試咗三四次都唔敢落手，後尾要我叫佢『你嚟啦，你嚟啦』佢至敢摑，都得意嘅。」相對於被掌摑戲，Yvette覺得演親熱戲更難，她最驚不是抽離不到角色愛上對手，而是怕被觀眾指她「發姣」，「因知道對手關楚耀同女友感情好，有時都驚自己捉唔到親密嘅程度，會被人話發姣，可能自己諗多咗，因未試過演呢類角色，所以都有呢種周邊壓力。」她又多謝劇組為免她尷尬，拍攝時都有清場。
劇中Yvette與關楚耀及高鈞賢陷入三角戀，而二人亦象徵麵包與愛情，問她現實中會選擇愛情還是麵包？「暫時未遇過呢種情況，現實中嘅愛情比較複雜，冇得淨係選擇愛情定係淨係選擇麵包，所以都好睇對方畀我嘅感覺，話唔定見到個好靚仔嘅會『沉船』都唔定。」提到近日她被翻舊賬，指她的樣子愈來愈精緻，尤其鼻樑及下巴，被質疑整容，她承認有接觸醫生，並指醫美在此時代好平常，但就否認有整容，下巴變尖全因一個意外：「入行之前兩三年我仆親縫咗幾十針，而下巴嗰位變尖喺因為裏面啲肉增生咗，之前選港姐包包面時係唔覺，但前幾個月中咗新冠，瘦咗好多，面形變得好奇怪，我而家都有做雷射去疤，可能刺激到又腫番。」
