前經理人鬧反骨 紐尼斯被詛咒
達雲紐尼斯（見圖）去夏從賓菲加轉投利物浦，但他卻被前經理人拿沙維亞鬧爆他反面唔認人，並咒他有報應。
紐尼斯早在効力烏拉圭勁旅彭拿路時，便與拿沙維亞共事，但他轉會到賓菲加後卻將經理人轉換為佐治文迪斯，後者更完成他之後過檔「紅軍」的8,500萬鎊重磅交易。拿沙維亞說：「達雲將會喺另一間公司走一條新嘅道路，係可以嘅，而我係無權反對。但我知道嗰陣係有6名保鑣押走佢，令我唔可以同佢道別，咁樣係會有報應。」
另一方面，達雲紐尼斯首季雖42戰入15球，但仍獲主帥高普力撐表現對辦，「達雲仍有機會有更好嘅表現，但好明顯係佢要時間嚟適應。對於一名前鋒嚟講，最困難係要融入一支進攻狀態下滑嘅球隊，按照我哋嘅標準嚟講，如果我哋今季可以攞到70、80分，達雲肯定可以入到廿球……球隊正同佢一齊努力，等佢為球隊作出更多貢獻。」
