紅館騷宣布終極加場 克勤因顧家8年沒社交

◆李克勤新歌MV邀請袁富華(左一)演出,仲有駱振偉同蔡潔飾演一對新婚夫婦。
◆李克勤新歌MV邀請袁富華(左一)演出,仲有駱振偉同蔡潔飾演一對新婚夫婦。

  香港文匯報訊 5月將會與香港管弦樂團舉行紅館演唱會的李克勤昨日推出新歌《弦續》,並同步宣布6場紅館騷火速爆滿,現加開5月20日終極尾場,門票5月3日公開發售。

  為今次演唱會,克勤特別錄了新歌《弦續》,編寫與香港管弦樂團再度攜手合作的友誼,亦描寫大家人生之中,每階段與隊友久別重逢的珍惜。歌曲MV以「散聚有時」為基礎,並以婚禮現場及教堂追思會作為兩大場景,克勤稱MV中有很多大家熟悉的面孔出現,「呢個MV其實係講曾經一班友,大家一齊玩音樂,但經過咗一段時間後,就各有各嘅生活,過咗咁多年後又再聚埋一齊嗰個感覺,好濃厚嘅人情味。所以其實咁多人拍攝係好開心,最開心邀請到袁富華演出,佢之前拎過金像獎、金馬獎男配角,亦都提名過金馬獎最佳男主角,仲有駱振偉同蔡潔就係飾演一對新婚夫婦。」

  對於歌曲及MV,克勤謂錄歌時都已經感受很深,以前總以為人生最美好的是相遇,現在才明白,其實難得的是重逢,到今時今日更加覺得,最希望所有朋友都別來無恙,「其實我做咗爸爸之後,都長達七、八年冇乜社交活動,時間除咗分咗給工作,就幾乎用晒喺家人身上,囝囝大咗先開始有返空間見多啲朋友,所以唱時都好有感覺,歌詞講到好多人長大後的心聲。」他又謂去到他這個年紀,多少也會有這樣的經歷,因為各種原因,將感情放在一旁。

  除了推出新歌,克勤已經緊鑼密鼓地準備演唱會,提到相隔超過二十年後再次跟香港管弦樂團合作,他直言雙方感情升華不少。他表示跟管弦樂團合作,事先要更加心思細密的安排,而他完成香港演唱會後,緊接着將舉行巡迴演唱會。