戰士加蘭 轟147躋身歷史行列
外號「戰士」的英格蘭桌球好手加蘭威爾遜，前日在世界桌球錦標賽打出職業生涯最漂亮一仗，在首圈面對賴恩戴爾之戰，先於第5局打出「滿分147」，成為克魯斯堡史上第8人，而他全場共打出5桿「破百」，亦是繼奧蘇利雲及艾倫後，第3位在世界賽首圈造出此佳績球員。
最終以10:5淘汰賴恩戴爾的加蘭威爾遜賽後表示：「打出147真係難以置信，我通常都好冷靜同低調，但今日我真係好興奮，能夠成為桌球歷史一部分真係冇得彈，呢樣係有錢都買唔到，當我老咗再回憶睇番，肯定係個偉大成就。」世界排名第7的他，下圈將會硬撼4屆世界冠軍希堅斯。
另外，昨晚結束的另一場首圈賽事，在首節以7:2帶出的佩利，來到第二節卻形勢逆轉，對手米健士發揮凌厲後勁，在之後8局贏出7局，反超前9:8，然後再在決勝局打出一桿63分帶出，最後成功反勝晉級。
