謝君豪「登六」 開心可享$2搭車
半百好友到賀兩大影后陪切燒豬
金馬影帝謝君豪（豪哥）3月23日迎來60歲生日，特意舉辦「謝君豪影藝好友派對」，圈中台前幕後半百好友均有前來到賀，兩大影后劉嘉玲及毛舜筠更陪伴豪哥一同切燒豬賀壽，其他嘉賓還包括王丹妮、廖子妤、栢天男、魏浚笙、梁仲恆及黃愷傑等，現場更擺出豪哥多年來的作品海報，包括《南海十三郎》、《全力扣殺》及《明日戰記》等，讓大家一同見證他這些年來的經典作。
對眾多好友特意前來祝賀，豪哥在台上再次感謝大家參與，台上亦播出特備片段恭賀，豪哥開心道：「今年非常幸運有唔同作品，又可以同各位世叔伯打招呼，一時又要拯救地球、一時又要揸的士、一時又要打官司，覺得既過癮又開心。」他又感謝各電影公司老闆以及夥伴們畀他機會一同合作，更打趣說：「我依家已踏入可用樂悠咭以兩蚊搭車嘅年紀，真心覺得好正。不過我份人仍然抱有夢想，喺追求理想嘅過程尋求自己嘅人生同樣相當重要，大家共勉，我哋彼此努力。」
慶生環節除了有豪哥親自獻唱外，王丹妮、廖子妤及魏浚笙等都有在台上為豪哥送上生日歌，及後眾人再為豪哥送上一隻燒豬作為生日蛋糕賀壽。王丹妮及廖子妤更介紹自己送給豪哥的禮物，王丹妮笑言：「上網搵相再曬出來剪貼，將豪哥歷年來演過嘅角色都貼喺相框內，花咗整整一晚時間親手製作。」廖子妤知道豪哥喜歡小酌，挑選了一支氈酒作賀禮。魏浚笙除了送香檳外，因得知豪哥近日換了新電話，特意訂製一個新手機殼作禮物。
希望未來再開拓新興趣
豪哥表示：「本身冇諗過搞生日會，不過今年60歲，又可以拎樂悠咭，搭車可以用$2，覺得呢件事好正，經理人就提議幫我籌辦生日會。」提及他切燒豬時眼泛淚光，他笑言有點感觸、感動，「大家陪我過生日，其實我好耐冇喺香港同觀眾見面，呢大半年來有數套作品相當開心，感謝各位。踏入60歲，其實數字只係個標誌，30、40、50歲每個數字都有佢嘅意義，直到60歲覺得自己再長大咗啲，但唔係老成持重、得高望重嘅老人家，最緊要保持青春、年輕及激情嘅一團火，希望再開拓一啲新興趣，例如攝影。」對於收到的禮物大部分都是酒，他澄清說：「其實我只可小酌，唔算好飲得，但相當感謝大家送嘅禮物，特別多謝Jeffrey（魏浚笙）送咗手機殼畀我，個殼好潮，真係多謝佢。」
