熱刺慘失分 干地鬧爆自私

  熱刺前晚英超作客修咸頓一度領先2球,最終被逼和3:3,除了錯失升上第3位的機會,主將李察利臣更傷出要喊住離場,賽後主帥干地失控插爆球員。

  干地說:「我哋有11人在場,但我睇到好多球員好自私,佢哋唔係互相幫助,並冇真心付出。」他更指出球隊已較上屆進步,但在精神上反而更差,他說:「當球隊唔再係一個整體嘅時候,任何唔好嘅嘢都有可能隨時發生……之前足總盃我哋就俾錫菲聯淘汰……且同類事情多不勝數……呢啲問題其實可以改變,但問題係球隊已經習慣咗。」干地串爆指:「廿幾年無冠軍,就算再換幾多個主帥都無用。」就似一巴掌摑向班主利維。

  有傳干地於季尾約滿後,不獲續約,因此失控狂插球員博炒,但班主利維則指:「好多人都話干地不應留低,但換轉係我,我會俾佢留低繼續做好呢份工囉。」