主持J2真人騷《我要瞓鬥》 曾比特分享抗眼瞓3奇招
J2（82台）以「捱眼瞓」為主題的真人騷《我要瞓鬥》前晚展開招募行動，參賽者必須以兩人為一組，並肩捱過各種刁鑽又抵死的「催」眠任務及考驗；成功捱過60小時的參賽者，將可挑戰贏取至少港幣十萬元的獎金獎品。大會將不定時安排「驚喜環節」及「特別嘉賓」為參賽者打氣；至於主持人選暫定為曾比特（Mike）、陳葦璇及陸浩明，但不排除隨時加碼。
首度主持電視節目的Mike，對於可以親睹參賽者各出奇招捱眼瞓大表期待。揚言愛瞓覺的Mike，笑指隨着年紀漸長已甚少「捱夜唔瞓」，並分享抗眼瞓3大奇招：「平時眼瞓會食香口膠，或者周圍行嚟行去同大聲地唱歌提神。我覺得眼瞓好多時係因為坐喺度唔郁，坐吓坐吓就會好悶。所以你見我成日走嚟走去係因為我成日都好眼瞓。」談到過去的捱夜歲月，Mike笑言很多時候是因為去了唱卡拉OK，「我試過唱完通宵K再繼續去做嘢，感覺做所有嘢都好似更亢奮咁，當然再過多一日就冧咗係咁瞓。」並謂人生最難忘的一次失眠，是因為在傍晚6時喝了咖啡提神。
