陳展鵬追求新鮮感 不介意演反派
12年後再與馬明合作互換身份
由文偉鴻（Jazz）監製，馬國明（馬明）、陳山聰、陳展鵬、江美儀、唐詩詠、劉佩玥及劉穎鏇（Tiffany）等主演的新劇《隱形戰隊》將於下周一（6日）播映，其中展鵬與馬明是相隔12年再合作，當年展鵬做男一，馬明則演反派，而今次他們就「身份互換」，馬明演忠角，他則演反派；展鵬表示最緊要觀眾有新鮮感，無論要他演什麼角色都可以。
今次劇中除有連番動作、槍戰、爆破及追逐場面，為打造真實感及加強視覺震撼度，不少場面均是荷槍實彈；其中自《同盟》開始已在觀眾心目中建立了好打形象的山聰，坦言今次有兩大挑戰：「特種部隊戲我係第一次演，仲要係反恐，無論造型、身形要求都嚴格好多，包括揸槍。今次揸槍都得到好多方面嘅指導，包括武指同專業人士，同埋因為多真槍，嗰下槍聲係好猛烈，同真係會有火花，變咗好容易眨眼。Jazz成日提我哋唔好眨眼，我都算係眨得幾多嗰位。出街時你哋見到我哋冇乜點眨，係因為Jazz下咗好多苦功去剪接。」
山聰讚劉穎鏇進步神速
雖已貴為視帝，但山聰為了演出仍是努力做足功課，之前在首輪官方宣傳片曝光的「一人搶兩槍」神技，山聰單是事前反覆練習已花了兩個月時間：「真正拍嘅時候都NG咗好多次，我自己都不斷要求retake，咁努力都係想帶刺激感畀觀眾。」除了苦練槍法及型甫，山聰又花了3個月時間健身鍛煉：「今次係我有史以來最大隻。」又大讚日日一齊操Gym的Tiffany進步神速：「其實我同Tiff同一間Gym嘅，所以變咗嗰時開始我哋已經日日都見，佢今次真係更加進步。」
至於飾演奸角的展鵬透露最開心是相隔12年後以「身份互換」形式再與好友馬明合作：「我好記得我喺無綫第一套做男主角嘅劇係《真相》，當年馬明喺最尾嗰幾集做反派，我同佢都friend，會一齊踢波，當年好多謝佢支持我客串做反派，嗰時我已經講，希望將來有套劇馬明做主角時，我又可以做番反派，客串又好主位又好，呢個係我其中一個喺TVB最大心願。」對於相隔多年再演奸角，展鵬笑指最希望觀眾能期待和覺得有新鮮感：「我一路以嚟最希望就係畀到觀眾新鮮感，所以做咩角色都冇所謂，反派、小角色、客串或反串都好，最緊要觀眾覺得陳展鵬有新鮮感，因為我哋一年裏面可能出幾套劇。」
