無厘頭自薦片超爆笑 蔡思貝務求令觀眾噴飯
蔡思貝在《廉政狙擊》飾演廉政公署調查主任，前晚她的出場方式相當特別，劇情講述她為了由原來部門調往跟譚俊彥，竟自導自演一條超騎呢見工片，片中她除了Rap住自我介紹，又化身運動達人上山下海兼玩埋射擊，最後更連頌缽都玩埋，相當無厘頭。
思貝受訪時透露自己在劇中動作場面不算多，反而是負責緩和氣氛及搞笑：「啲劇情成日去到我度就會古怪咗，佢哋話我主要就係負責令觀眾放鬆，同埋令性格拘謹的洛子峰（黃宗澤飾）生命作出改變，希望大家都鍾意啦。」問到Rap住自我介紹是否很尷尬？「因為導演要求我要Rap到懶有自信，但其實係要Rap得唔好，正所謂『認真做無聊事』，所以拍嘅時候要忍笑；仲有介紹頌缽嗰個腔調，都特意想令人睇到噴飯，所以呢個角色幾好玩。」扮演黃宗澤媽媽的黎燕珊亦於前晚登場，更素顏上陣，她笑言：「我唔止素顏，仲要再化老啲！因為我飾演單親媽媽，經歷咗好多嘢，所以必須喺造型上花心思。」談到保養之道，她表示沒甚特別，「我鍾意做運動、少啲夜生活、食嘢都清淡，我認為運動先係我嘅保養重點！」
