關心妍慈善唱 邀基層紅館睇騷
福音歌曲做主題
關心妍（Jade）去年6月假紅館舉行出道20周年演唱會，事隔未夠一年，今年4月她將再踏紅館舉行《關心妍Shine妍亮福音慈善演唱會》，日前她現身攝影棚為個唱拍攝宣傳海報，並表示今次雖是紅館Part 2的檔期，但她選擇不做Part 2，而是製作一個全新的善慈演唱會，並以流行福音歌曲做主題，希望可以祝福香港的朋友。
Jade笑言沒想過會獲批檔期搞騷，「諗住兩三年後先會批到期做演唱會，點知入完表格冇幾耐就真係批咗，仲急過上年嘅騷，所以製作過程比之前更有難度。」Jade創辦的「妍亮生命慈善基金」一直致力於幫助弱勢社群，雖然過去也有舉行籌款演出，但今次是她首次在紅館做籌款演唱會，希望可以祝福香港的朋友之餘，她更拒收歌酬，且自發捐款，以達到一百萬的籌款目標，「其實我嘅慈善基金一向都係靠我啲歌酬同埋教唱歌去營運，今次仲要捐多啲錢出嚟，暫時目標希望有一百萬嘅門票，並免費邀請低收入同基層家庭、情緒病患康復者、中學生去睇騷，因為佢哋可能未嚟過紅館睇演唱會。」
囡囡當正自己做嘉賓
她謂過去一直有好多圈中人支持其基金，今次計劃「碌卡」邀請他們到場做嘉賓：「圈中好多朋友都會嚟做嘉賓，但人名就賣個關子先，早排我趁團年聚會同佢哋講呢件事，所以呢排同我食飯嘅，你就知我想搵你做嘉賓喇！」
雖然Jade曾舉行多次紅館個唱，但今次這個騷是香港首個以流行福音歌曲做主題的演唱會，更獲相關團體支持，令她非常緊張：「因為我都想有突破、做啲新嘢，大家可能聽慣我啲悲情歌，但今次演唱會會唱啲開心、正向嘅歌曲。」她又指過年前很多人指她太瘦，要吃多些東西，但一過完年知道要做騷，又要開始Keep fit及戒口。而上次開騷時，她的囡囡心心有上台表演打觔斗，而今次心心也已為個唱做準備，更埋怨媽咪沒帶她拍攝海報：「佢以為自己一定有份做呢個騷，不停提議唱咩歌好，同埋上次佢表演打觔斗太好喇，我都唔知佢有冇其他新技能夠騷到畀大家睇。今日出門口嚟影海報，佢好緊張問我去邊，做乜唔帶佢嚟一齊影，心心已經當正自己係嘉賓之一。」Jade表示會教囡囡用利是錢來買票支持，並提議她就今次慈善騷向身邊同學仔籌款。
