密謀在娛樂圈大展拳腳 梁超怡冀撇甩港姐形象
黎諾懿、賴慰玲、戴祖儀、關楓馨及梁超怡，踏入兔年各有新年願望及計劃，其中由演員晉升監製的諾懿，新一年最想能有覺好瞓：「上一年因為大仔身體比較差，經常搞到我哋兩公婆冇得瞓，希望兩個仔生生性性身體健康，仲有賺多啲錢。」同時要兼顧事業及家庭的賴慰玲，平日除了開工還要照顧兒子，她跟諾懿一樣希望可以有覺好瞓：「我好易滿足，有兩日可以瞓到20個鐘。」
戴祖儀與關楓馨今年最大的願望是可出埠旅行，關楓馨希望去得越遠越好，以及食極唔肥。祖儀就比關楓馨更快實現旅行的願望：「踏入兔年我喺澳門同大家倒數，之後就去日本玩，然後會同麥美恩去韓國，而今年願望係不斷不勞而獲。」
港姐季軍梁超怡尚有大半年才卸任，但她已密謀在娛樂圈大展拳腳：「希望接到好多工作，同埋撇甩港姐形象，跳出港姐範疇，仲有身體健康，再練出腹肌。」在外國長大的她，笑言多年未有在港過新年，今年要逗回過去幾年的利是。
